Petropavlda qoqys shyǵarý tarıfin shamamen eki ese ósirmek

PETROPAVL. QazAqparat – Petropavlda halyq úshin turmystyq qatty qaldyqtardy shyǵarýdyń jańa tarıfin bekitý týraly joba nusqasy ashyq normatıvtik-quqyqtyq aktiler portalynda jarııalandy, dep habarlaıdy QazAqparat tilshisi.

Joba «Petropavl qalasy boıynsha halyq úshin turmystyq qatty qaldyqtardy jınaýǵa, tasymaldaýǵa, suryptaýǵa jáne kómýge arnalǵan tarıfterdi bekitý týraly» dep atalady.

12 qańtar kúni jarııalanǵan qujat eki apta boıy talqyǵa túspek.

Petropavl qalalyq máslıhatynyń sheshimimen shahar halqy, sonyń ishinde jeke úı turǵyndary turmystyq qatty qaldyqtar úshin bir adamǵa 510,15 teńge tólemek.

Kóppáterdi úıdiń turǵyndary bir adam úshin aıyna 480 teńge tóleıdi. Al zańdy tulǵalardan 1 sharshy metr úshin 2782,61 teńge alynbaq.

Petropavl qalasynda qatty qaldyqtar úshin tarıf sońǵy ret 2017 jyly kóterilgen eken.

Kommýnaldyq qyzmettiń osy túrimen aınalysatyn kásipkerler baǵany ósirmek bolyp birneshe ret oqtalǵan edi.

Qoqys shyǵarýshylardyń aıtýynsha, qazir olardyń kirisinen shyǵysy kóp. Óıtkeni janar-jaǵar maı, qajetti qosalqy bólshekter qymbattaǵan.

Ári jumysshylardyń da eńbekaqysyn ósirý qajet. Tehnıka da eskirgen, sol sebepti qatty aıazdarǵa shydas bermeıdi eken.

Qazirgi ýaqytta qatty turmystyq qaldyq úshin kópqabatty úılerdiń turǵyndary bir adam úshin 220 teńge, jeke turǵyn úıler 234 teńge, al zańdy tulǵalar 1 tekshe metr úshin 2530 teńge tólep otyr.