Petropavlda qoqys shyǵarý tarıfi shamamen eki ese qymbattaıdy

PETROPAVL. QazAqparat – Petropavl qalalyq máslıhatynyń depýtattary turmystyq qatty qaldyqtarǵa jańa tarıfti bekitti. Ol buǵan deıinge tólemnen shamamen eki esege artyq, dep habarlaıdy QazAqparat tilshisi.

Jańa tarıf Soltústik Qazaqstan oblysynyń Ádilet departamentinde tirkelgennen keıin qoldanysqa enedi.

Endi shahar halqy, sonyń ishinde jeke úı turǵyndary turmystyq qatty qaldyqtar úshin bir adamǵa 510,15 teńge tólemek.

Kóppáterdi úıdiń turǵyndary bir adam úshin aıyna 480 teńge tóleıdi. Al zańdy tulǵalardan 1 sharshy metr úshin 2782 teńge alynbaq.

Depýtattar bul sheshimge kelmes buryn kommýnaldyq kásiporyndardyń da, turǵyndardyń da pikirin tyńdap, esepke aldy.

Petropavldyqtar sońǵy kezde qoqys ydystarynan qaldyqtyń ýaqytynda shyǵarylmaýyna jıi shaǵymdanatyn bolǵan.

Al kommýnaldyq qyzmet kórsetetin kompanııalar óz kezeginde onyń kúndelikti shyǵarylmaýyn tarıftiń tómendigimen, jumystyń ózin aqtamaýymen túsindirip keldi.

Kásipkerlerdiń aıtýynsha, kommýnaldyq kásiporyndardyń búginde kirisi shyqqan shyǵyndy jappaıdy. Birneshe jyldan beri arnaıy tehnıka jańartylmaǵan.

Munyń bári qyzmettiń sapasyna áser etip otyr.

Jalpy Petropavlda sońǵy ret qatty turmystyq qaldyqtardy shyǵarý tarıfi 2018 jyly kóterilgen.

Qazirgi ýaqytta qatty turmystyq qaldyq úshin kópqabatty úılerdiń turǵyndary bir adam úshin - 220 teńge, jeke turǵyn úıler - 234 teńge, al zańdy tulǵalar 1 tekshe metr úshin - 2530 teńge tólep otyr.

Al turǵyndardyń qoqys úshin qaryzy búginde 23 mln teńgeden asyp ketken.