Petropavlda kóktemgi sý tasqyny kezinde úı janýarlaryna arnalǵan evakopýnkt ashylmaq
PETROPAVL. QazAqparat – Petropavlda kóktemgi sý tasqyny kezinde úılerin sý basqan turǵyndar dalada qalmaýy úshin evakýatsııalyq pýnktter ázirlenip jatyr, dep habarlaıdy QazAqparat tilshisi.
Petropavl qalasy boıynsha 4 negizgi evakýatsııalyq pýnkt jumys isteıdi. Sonyń biri – Zarechnyı kentindegi №13 qalalyq orta mektepte ornalasqan. Bul jerde búginde 50 adamǵa oryn daıyn tur.
«Bizge kelýi múmkin adamdardyń tizimi jasaldy. Jatatyn oryndar, medıtsınalyq pýnkt, ashana – bári daıyn. Ana men balaǵa arnalǵan bólme, anyqtama stoly bolady. Qosymsha 3 telefon nómirin alyp, ornattyq. Tizimde múmkindigi shekteýli 15 adam bar. Olardyń júrip-turýyn jeńildetý úshin pandýs qoıyldy. Jalpy, bizge kómek surap kelgenderdiń bárin qarsy alýǵa ázirmiz. Bizdiń mektepten ǵana on shaqty adam kúnelikti kezekshilik etetin bolady. Kúzet qoıamyz, psıhologııalyq kabınet jumys isteıtin bolady. Azyq-túlik máselesi de búginde tolyq sheshilgen», - deıdi Petropavl qalalyq №13 orta mekteptiń dırektory Abaı Qaısın.
Qalǵan evakopýnktter sý basýy múmkin aýmaqtarda - Oıqala, Bylǵary zaýyty yqsham aýdandardaǵy 14 jáne 12-shi orta mektepterde ornalasady. Taǵy bireýi Jas órken yqsham aýdanyndaǵy 40 orta mektepte ázirlendi. Buǵan, mamandardyń aıtýynsha, saıajaılardyń turǵyndary jetkizilmek. Árqaısysynda 70-ke jýyq jatyn oryn bolady.
«15 aqpan men 15 naýryz aralyǵynda kóktemgi sý tasqynyna baılanysty aılyq ótip jatyr. Maqsatymyz – halyqty aldyn ala eskertý, túsindirý jumystaryn júrgizý. Jalpy biz 189 tehnıkany ázirledik. Kóktemgi sý tasqyny ýaqytynda qala boıynsha qutqarýshylar, polıtseıler, jerglikti bılik ókilderi - 150 adam jumys isteıdi. Qazir 4 evakýatsııalyq beket daıyn. Budan basqa úı janýarlaryna arnalǵan taǵy bir evakýatsııalyq beket Petropavl qalasynda ashylady», - deıdi Petropavl qalasy Tótenshe jaǵdaılar basqarmasynyń bastyǵy Dmıtrıı Rastıhın.
SQO-da 2017 jyly kóktemde aýqymdy sý tasqyny boldy. Sol jyly №13 qalalyq orta mektepte ornalasqan evakýatsııalyq pýnktti 60 adam pana etken. Bıyl jaǵdaı ýshyǵatyn bolsa, mamandar qosymsha taǵy jeti evakýatsııalyq oryndy ashýǵa ázir.
