Petropavlda kóktemde sý basýy múmkin 240 úı bar
PETROPAVL. QazAqparat – Petropavlda sý basýy yqtımal jerlerdiń tizimi jasaldy, dep habarlaıdy QazAqparat tilshisi.
Petropavlda qalalyq ákimdiktiń apparattyq keńesi ótip, áleýmettik jelide kóptiń talqysyna túsken qańǵybas ıttermen kúres, kóshelerden qar shyǵarý máseleleri qaraldy. Qala ákimi Bolat Jumabekovtiń aıtýynsha, qańǵybas ıtterdi aýlaý jumystary toqtaǵan emes. Jyl basynan 700-den astamy aýlanǵan. Qala turǵyndaryna, ásirese, mektep oqýshylaryna qaýip tóndiretin ıesiz janýarlar oblys ortalyǵynda jeterlik. Qańǵybas ıtter Jumysshy men Zarechnyı kentterinde kóp shoǵyrlanǵan. IKOMEK-109 dıspetcherlik qyzmetine kún saıyn turǵyndardan shaǵym túsip, veterınarııalyq qyzmet ótinimder boıynsha jumys isteıdi. Budan bólek ıt ıelerine jaýapsyzdyq úshin 335 hattama toltyrylǵan.
Apparattyq keńeste Petropavldan qar shyǵarý máselesi de nazardan tys qalmady.
Petropavl qalalyq ákimdiginiń málimetinshe, abattandyrý erejelerine sáıkes kásipkerler bıznes nysandarynyń aınalasyndaǵy bes metr aýmaqty jınaýy tıis. Alaıda, bul jumys tıisti deńgeıde atqarylmaı otyr.
«Jergilikti polıtsııa qyzmetine kásipkerlermen jumys isteý kerek. Olarǵa irgeles aýmaqty kútip ustaý men olardyń jaýapkershiligi boıynsha túsindirý-aldyn alý jumystaryn kúsheıtý qajet», - dedi Bolat Jumabekov.
Búginde kásipkerlik nysandarynyń 194 basshysymen túsindirý jumysy júrgizildi. Solardyń 61-i «eskertý» túrinde ákimshilik jaýapqa tartyldy.
Petropavl ákiminiń aıtýynsha, sý basýy múmkin qaýipti shaǵyn aýdandar nazarǵa alynǵan. 2017-2020 jyldardaǵy taldaý negizge alynyp, sý basýy yqtımal jerlerdiń tizimi jasaldy. Qazirgi kezde oblys ortalyǵynda sý asynda qalýy yqtımal 240 úı bar.
«Petropavl kóshelerinen qar shyǵarýǵa 245 tehnıka jumyldyrylǵan. 31 naýryzǵa deıin kárizderdi tazartýdy aıaqtaý josparlanǵan, búginde olardyń 85 %-y jumysqa daıyn. Barlyq drenaj sorǵylarynyń jumysy tekserildi. TKSh bólimine barlyq káriz qudyqtaryna tekserý júrgizý tapsyryldy. Sebebi aýyr tehnıka qar tazalaǵan kezde qaqpaqtar ashylyp ketýi múmkin. Budan bólek, júrginshiler joly men trotýarlarǵa sebiletin qum-tuz qospasynyń kólemi arttyrylmaq», - deıdi Petropavl ákimi Bolat Jumabekov.
