Petropavlda kóktemde egilgen kóshetter ornynda bolmaı shyqty
PETROPAVL. KAZINFORM – Petropavlda turǵyndar halyqaralyq eko-blogerdiń qatysýymen kóktemde otyrǵyzylǵan shyrsha kóshetterin izdep jatyr.
Áleýmettik jelide jarııalanǵan jazbada qala turǵyny óziniń Alekseı Sıbırskıı uıymdastyrǵan eko-aktsııaǵa qatysyp, basqalarmen birge tal ekkenin aıtady. Kóshetterdiń qalaı óskenin kórmekke kelgen áıel olardy ornynan tappaǵan.
Sol joly eko-bloger 10 myń túp shyrshanyń kóshetin Petropavlǵa syılasa, taǵy 5 myń túp bıýdjet qarajatyna alyndy. Aǵashtar qaladaǵy Borkı kentiniń janyndaǵy úlken alqapqa otyrǵyzyldy.
Aǵashtardyń qaıda ketkenin bilý úshin SQO Tabıǵı resýrstar jáne tabıǵat paıdalanýdy retteý basqarmasyna habarlastyq. Basqarma basshysynyń orynbasary Qaırat Qalyqovtyń aıtýynsha, kóshetterdi eshkim urlaǵan joq.
- Kóktemde kóshet otyrǵyzylǵan alqap arqyly halyqaralyq mańyzy bar gaz jáne munaı qubyry ótedi eken. Jaýapty kompanııa ókilderi ol jerde jıi qazba jumystary júrgiziledi, kóshetter basylyp qalady degen soń, úsh myń túpti qazyp alýǵa týra keldi. Qalǵandaryna tıisken joqpyz, sol jerde ósip jatyr, - deıdi Qaırat Qalyqov.
Al qazyp alynǵan shyrsha kóshetteri eki orman sharýashylyǵyna aparyp egilgen.
- Bir bóligi Bogolıýbovo orman sharýashylyǵynyń pıtomnıgine aparyp otyrǵyzyldy. Endi bir bóligi Petropavl mańyndaǵy Kýıbyshevskoe orman sharýashylyǵy aýmaǵyna aparyp egildi. Tehnıkanyń astynda basylyp qalsa obal ǵoı, - deıdi Qaırat Qalyqov.
Buǵan deıin Abaı oblysynda 5 myń túp aǵash kósheti otyrǵyzylǵanyn jazǵan edik.