Petropavlda qoqys alańdaryna jasandy ıntellekti bar beınekameralar qoıylyp jatyr

PETROPAVL. KAZINFORM – Petropavlda qoqys tastap, abattandyrý erejesin buzǵan 6400-ge jýyq adam ákimshilik jaýapkershilikke tartyldy.

Petropavl ákimi Serik Muhamedıevtiń aıtýynsha, ruqsatsyz paıda bolǵan qoqys alańdaryn joıý jumysy jalǵasqan. «Ǵarysh Sapary» ulttyq kompanııasynyń spýtnıktik tehnologııalary arqyly bıyl 9 qoqys alańy anyqtaldy. Turǵyndardyń ótinishteri men josparly tekserýler barysynda jalpy 39 qoqys alańy joıylyp, 320 tonnadan astam turmystyq qaldyqtar shyǵaryldy. 

- Petropavldyń sanıtarlyq jaǵdaıyn baqylaýdy kúsheıtý úshin kezekshilik kestesi jasaldy, sondaı-aq shamamen 100 beınebaqylaý kamerasy ornatyldy. Bul qoqysty zańsyz tastaý faktilerin jedel anyqtaýǵa jáne aldyn alýǵa múmkindik beredi.

Ýchaskelik ınspektorlardyń kómegimen jyl basynan beri 89 reıd ótkizildi jáne zańdy buzǵan 6390 adam jaýapkershilikke tartyldy, - deıdi Serik Muhamedıev. 

Sonymen qatar, testtik rejımde pılottyq joba júzege asyp jatyr. Qoqys alańdaryna 43 jasandy ıntellekt elementteri bar kamera ornatyldy. Ákimniń aııtýynsha, kelesi jyly taǵy 200 kamera qoıý josparlanyp otyr. Nátıjesinde qoqys konteınerleriniń tolý deńgeıin baqylaýǵa, úlken kólemdi qoqystyń jınalyp qalmaýyna jáne turmystyq qaldyqtyń ýaqtyly shyǵarylýyn baqylaýda ustaýǵa múmkindigi bar ınteraktıvti karta engizildi. 

- «Aqyldy qala» júıesin damytý aıasynda turǵyndardyń qaýipsizdigi, qalanyń ekologııasy jáne jaılylyǵyn arttyrýǵa baǵyttalǵan ınnovatsııalyq sheshimderdi engizý josparlanǵan. Olarǵa qoǵamdyq jumysqa jegilgen sottalǵandardyń jumysyn jáne avtokólik joldarynyń sapasyn avtomattandyrylǵan baqylaý júıesi, beınebaqylaý kameralaryn keshendi aýdıtteý jáne ıntellektýaldy kólik júıesi kiredi. Barlyq júıeler iKomek platformasy negizinde SuperApp jelisinde biriktiriletin bolady, - deıdi Serik Muhamedıev. 

Buǵan deıin Almatyda JI kómegimen «aqyldy qala» júıesi damytylyp jatqanyn jazǵan edik.