Petropavlda qoǵamdyq kóliktiń jolaqysy qymbattady
Petropavl qalalyq ákimdiginiń málimetinshe, búgin qalalyq máslıhat depýtattary kezekten tys ótken 7-shi sessııada qoǵamdyq kólikte jol júrýdiń jańa tarıfterin bekitti.
«Tarıfti kóterý jónindegi jumys byltyr qarasha aıynan bastap qolǵa alyndy. Petropavlda sońǵy ret 2017 jyly qoǵamdyq kóliktiń bıleti qymbattady, sodan beri 6,5 jyl ótken eken. Osy aralyqta úlken ınflıatsııa boldy, janar-jaǵarmaı qymbattady, júrgizýshilerdiń eńbekaqysy ósti, basqa da shyǵyndar kóbeıdi. Máselen dızel otynynyń lıtri 124 teńge bolsa, qazir 290 teńge, al qysta tipten qymbattaıdy. Osyǵan oraı jolaýshy tasymaldaýshylar ákimdikke usynyspen keldi. Bizde tarıfterdi qaraıtyn vedomstvoaralyq komıssııa bar, kásipkerlerdiń usynysy birneshe ret jıynda qaraldy», - deıdi Petropavl qalasy ákiminiń orynbasary Ádilbek Áýbákirov.
Qazir ol kartochkamen esep aıyrysqanda 80 teńge, qolma-qol aqshamen tólegen ýaqytta 130 teńge turdy. Jańa tarıf kartochkamen esep aıyrysqan jaǵdaıda 100 teńge, qolma-qol aqshamen 170 teńge bolmaq. Al balalar bıleti 50% arzan.
«Jańa tarıfter shamamen eki aptanyń ishinde engiziledi, óıtkeni máslıhat qaýlysy tıisti zań rásimderinen ótýi kerek.
Baǵany qalyptastyrýǵa birneshe faktor áser etedi. 2021 jyldan bastap áleýmettik mańyzy zor dep tanylǵandyqtan jolaýshylar tasymalyna sýbsıdııa bere bastadyq. Qazir tarıfti qymbattatqannan túsken qarjy olardyń bar shyǵynyn jaba almaıdy. Sol sebepti ákimdik áli de sýbsıdııa bóletin bolady.
Kúnde Petropavl kóshelerine 185 avtobýs 18 baǵyt boıynsha shyǵady. Buryn 19 baǵyt bolǵan, biz ońtaılandyrdyq, bul jumys áli jalǵasady», - deıdi Ádilbek Áýbákirov.
Orta eseppen Petropavlda 56-75 myń adam qoǵamdyq kólikti paıdalanady.
