Petropavlda qoǵamdyq kóliktiń eki baǵyty qysqardy
PETROPAVL. QazAqparat – Petropavlda 18 qazannan bastap qoǵamdyq kóliktiń eki baǵyty qysqartýǵa ilikpek, dep habarlaıdy QazAqparat tilshisi.
Petropavl qalalyq ákimdigi baspasóz qyzmetiniń málimetinshe, oblys ortalyǵynda qoǵamdyq kólik jumysyn ońtaılandyrýǵa qatysty birqatar jumystar atqarylyp jatyr. 1 jeltoqsannan bastap avtobýstarǵa elektrondy bılet júıesi engizilmek.
«Bul jumys jolaýshy tasymaldaýshylardyń jumysyn baqylaýda ustaý maqsatynda júrgizilip jatyr. Osylaısha olardyń naqty tabysy belgili bolady jáne bıýdjetke túsetin qarjy kólemi ulǵaımaq. Qoǵamdyq kólik bıletiniń baǵasy ózgerissiz qalady. Eresekterge - 80 teńge, mektep oqýshylaryna - 40 teńge. Al qolma-qol esep aıyrysqan jaǵdaıda jolaýshylar 130 teńge tólemek», - deıdi Petropavl qalalyq turǵyn úı-kommýnaldyq sharýashylyǵy bóliminiń basshysy Baqyt Іlııasov.
Elektrondy bıletter ázirge satylymǵa túsken joq, jospar boıynsha osy aı sońynda 400 teńgeden saýdaǵa shyqpaq.
Jolaýshy tasymalynyń sapasyn arttyrý úshin jyl sońyna deıin Petropavlǵa jańa avtobýstar jetkizilmek. Sondaı-aq qoǵamdyq kólik jumysyn ońtaılandyrý maqsatynda birneshe baǵytty qysqartý josparlanǵan.
«№ 19 jáne № 4m baǵyttaǵy avtobýstar alynady. Kásiporyn basshysymen olardy qysqartý jaıynda burynnan sóz qozǵalyp keledi. Óıtkeni bul baǵyttarda júretin jolaýshy az, sol sebepti avtobýs shyǵarý tıimsiz. Jaqynda olar bizge resmı hat joldap, 18 qazannan bastap osy eki baǵyt boıynsha avtobýstardyń jolǵa shyqpaıtynyn eskertti», - deıdi Baqyt Іlııasov.
