Petropavlda qoǵamdyq kólikterdi zararsyzdandyrýǵa qajet preparattar jetkilikti
PETROPAVL. QazAqparat – Petropavlda koronavırýs indetimen kúresý maqsatynda qoǵamdyq kólikter dezınfektsııadan ótkizilip jatyr, dep habarlaıdy QazAqparat tilshisi.
Petropavlda qoǵamdyq kólikterdi zararsyzdandyrý jumystary 14 naýryzdan bastap qolǵa alyndy. Avtobýstar baǵyty boıynsha aınalym jasap kelgen saıyn tazalanady. Bul jumystardy kólik júrgizýshisi nemese kontroler atqarady eken.
«Bizge sýlyq, maska, qolǵap, shúberekter men eritindi berdi. Qalaǵa shyǵyp kelgen saıyn salondy tolyǵymen súrtip, eritindini shashamyz. Al keshke qaraı garajǵa kirmes buryn bizge arnaıy qyzmetten kelip avtobýsqa dezınfektsııa júrgizedi», - deıdi avtobýs júrgizýshisi ıÝrıı Zaıtsev.
Ár avtobýs kúnine 7-8 reıs jasaıdy. Qazirdiń ózinde qoǵamdyq kólikpen júretin turǵyndardyń sany azaıǵan. Oǵan oqýshylardyń demalysqa, al stýdentterdiń qashyqtyqtan oqýǵa ketýi sebep.
«Petropavldaǵy qoǵamdyq kólikter shtattyq tártipte jumys istep jatyr. Tek ár aınalym saıyn avtobýs dezınfektsııadan ótedi. Qajetti preparattardy tasymaldaýshylardyń ózderi satyp aldy. Kólik júrgizýshilerine bul jumystardyń qajettiligi túsindirildi», - deıdi «SQO Avtokólik odaǵy» qaýymdastyǵynyń tóraǵasy Galına Semenova.
Galına Semenovanyń aıtýynsha, tasymaldaýshylarda qazirgi ýaqytta bir aıǵa jetetin zararsyzdandyratyn preparat bar. Kólikter ázirshe qalypty jaǵdaıda jumys isteıdi. Baǵyttar sany jolaýshylardyń ádetten tys azaıýyna baılanysty qysqarýy múmkin.
Jalpy qazir Petropavl qalasynda qoǵamdyq kólikter 22 baǵyt boıynsha jolaýshylar tasymaldaıdy. Bir kúnde 230-240 shaqty avtobýs jolǵa shyǵady eken.
