Petropavlda qoǵamdyq kólik júrgizýshisi rýlde mas bolǵan
PETROPAVL. QazAqparat – Petropavlda jolaýshylardy mas kúıde tasymaldaǵan avtobýs júrgizýshisi ustaldy, dep habarlaıdy QazAqparat tilshisi.
Soltústik Qazaqstan oblystyq Polıtsııa departamenti baspasóz qyzmetiniń málimetinshe, Petropavlda tártip saqshylary jolaýshylardy mas kúıde tasymaldaǵan «31 M» baǵytyndaǵy avtobýs júrgizýshisin ustady.
Mas júrgizýshi týraly habarlama túskennen keıin Jedel baqylaý ortalyǵy aqparatty tekserý úshin patrýldik polıtsııa batalonyn jibergen. Avtobýs Taýfık Muhamed-Rahımov kóshesinde toqtatyldy. Júrgizýshiden alkogoldiń ıisi shyǵyp turǵan. Muny jolaýshylar da rastady. Jaýap alý kezinde 54 jastaǵy júrgizýshi ishimdik ishkenin moıyndady.
Atalǵan fakti boıynsha ákimshilik materıal toltyryldy. Júrgizýshi sottyń sheshimimen 15 táýlikke deıin ákimshilik qamaýǵa alynyp, jeti jylǵa júrgizýshi kýáliginen aıyrylýy múmkin.
Medıtsınalyq kýálandyrý onyń orta dárejede mas bolǵanyn kórsetti. Osy qorytyndy negizinde jınalǵan materıaldar protsessýaldyq sheshim qabyldaý úshin Petropavl qalasynyń mamandandyrylǵan ákimshilik sotyna joldandy. Sondaı-aq, júrgizýshiniń baǵytqa shyǵýyna jol bergen avtobýs ıesine qatysty ákimshilik yqpal etý sharalaryn qabyldaý úshin ákimshilik quqyq buzýshylyq materıaldary qalalyq ákimshilik polıtsııa bólimine jiberildi.
Jyl basynan oblys joldarynda kólikti mas kúıde júrgizgen 349 júrgizýshi ustaldy.
