Petropavlda kisi óltirgenderge sot úkimi shyqty
PETROPAVL. QazAqparat – Petropavldaǵy «Blıýz» meıramhanasynyń janynda adam óltirgen Qajymurat Aıýp pen Ákimbaı Sádibekovke qatysty sot úkimi shyqty, dep habarlaıdy QazAqparat tilshisi.
Petropavl qalalyq sotynyń málimetinshe, oqıǵa byltyr 4 tamyzǵa qaraǵan túni «Blıýz» meıramhanasynda bolǵan. Demalýǵa kelgen Sádibekov pen Aıýp bı alańynda beıtanys jigit Aleksandr Trýbnıkovpen kelispeı qalady. Máseleni sheshý úshin úsheýi dalaǵa shyqqan.
Meıramhananyń kireberisinde Sádibekov jurttyń kózinshe Trýbnıkovti betinen urǵan. Muny kórgen Aıýp zardap shegýshini meıramhananyń syrtyna alyp shyǵyp, soqqyǵa jyqqan. Aýyr jaraqattan Trýbnıkov tilge kelmesten oqıǵa ornynda jan tapsyrdy.
Aıýp pen Sádibekov kinálaryn tolyq moıyndaǵan joq.
Petropavl qalalyq sotynyń úkimimen Ákimbaı Sádibekov QR Qylmystyq kodeksiniń 293-baby, ıaǵnı «buzaqylyq» boıynsha kináli dep tanylyp, 106 baptyń 3-tarmaǵy – «abaısyzda jábirlenýshiniń ólimine ákep soqqan densaýlyqqa qasaqana aýyr zııan keltirý» boıynsha tolyq aqtaldy.
Aıýp kerisinshe «buzaqylyq» baby boıynsha aqtalyp, QR Qylmystyq kodeksi 106-babynyń 3-tarmaǵy boıynsha jazaǵa tartyldy. Sádibekov 1,5 jylǵa, Aıýp 10 jylǵa bas bostandyǵynan aıyryldy.
Budan basqa sottyń sheshimimen Aıýptan qaza tapqan Trýbnıkovtiń áıeline 3 mln teńge moraldyq shyǵyn jáne 230 myń teńge shamasynda materıaldyq shyǵyn óndirip alynady.
