Petropavlda kınoteatrlar ashylyp, syrǵanaqtar jasalady
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, oblystyń bas sanıtarııalyq dárigeri jańa qaýlyǵa búgin qol qoıdy. Qujat 26 jeltoqsan saǵat 00.00-de kúshine enedi.
Jańa qaýlyǵa sáıkes halyq kóp jınalatyn is-sharalardy ótkizýge, sonyń ishinde jańajyldyq erteńgilikterdi, merekelik korporatıvterdi uıymdastyrýǵa tyıym salynady.
Kóńil kóterý oryndarynyń: karaoke, bılıard, kompıýter klýbtary men túngi klýbtardyń, kalıan oryndarynyń, boýlıng ortalyqtary men balalardyń oıyn alańdarynyń, býkmekerlik keńselerdiń, akvaparkterdiń jumysy ýaqytsha toqtatylǵanymen, kınoteatrlar ashylmaq. Kınoteatrlar jumys, demalys jáne mereke kúnderi saǵat 10.00-den 24.00-ge deıin ashyq
bolady. Kınozaldardy tek 30 %-ke toltyrýǵa ruqsat etilgen. Kórermender shahmat tártibinde jáne ár eki oryndy bos qaldyryp otyrǵyzylýy tıis.
Karantındik jáne shekteý sharalaryn buzý deregi anyqtalǵan jaǵdaıda olar óz jumysyn qaıta toqtatady.
Sondaı-aq Petropavlda merekege oraı 4 negizgi aýdanda balalarǵa arnalyp syrǵanaq jasalatyn boldy. Qalalyq ákimdik ókilderiniń aıtýynsha, turǵyndar bul jerde qaýipsizdik sharalaryn saqtaýǵa mindetti.