Petropavlda kezekti aýyl sharýashylyǵy ónimderiniń jármeńkesi ótti
PETROPAVL. QazAqparat - Qyzyljar bazaryna Jambyl jáne Aqqaıyń aýdanynyń eńbekqor sharýalary balǵyn, tabıǵı taza aýylsharýashylyq ónimderin jaıyp tastaǵan. Aýyl, selolardan kelgen ákimderdiń aıtýynsha baǵasy ózge saýda oryndarymen salystyrǵanda 15 paıyzǵa tómen. Mysaly, sıyr etiniń kelisi 850 tg, jylqy etiniń bir kelisi 1700 tg, úı taýyǵy 450 tg turady. Súttiń lıtri 110, sary maıdyń kelisi 950 tg.
Turmys Imanjanov, Blagoveşenka selosynyń ákimi, Jambyl aýdany:
- Jambyl aýdanyna bir bas sıyr, 4 bas qoı, 50 keli taýyq etin ákeldik. Eki keli kartop taǵy bar. Onyń barlyǵynyń quny 700 myń teńgege jyq.
Tańerteńnen kelip uzyn sonar kezekke turǵandardyń biri Qaıyrbolat Shııapov. Aqsaqal juma saıyn ótetin jármeńkege arnaıy kelip, aýyldyń dámin satyp alady. Aıtýynsha baǵasy kóńil kónshiterlik.
Qaıyrbolat Shııapov, qala turǵyny:
- Buryn aýylda turdyq. Sondyqtan jumasyna eki ret kelip sút qaımaq alamyn.
Jármeńkeniń bastalaǵanyna nebary 1 saǵat ótti. Bul ýaqyt ishinde saýynshylar ákelgen ónim taýsylyp ta úlgerdi. Irimshik, sút, qaımaq-maıdy qalalyqtar birden talan-tarajǵa saldy.
Alena Anohına, satýshy, Aqqaıyń aýdany:
- Biz ár senbi saıyn jármeńkege kelemiz. Ózim 9 sıyrdan alǵan ónimderimdi ákelip satamyn. Búgin 60 lıtr sút, 50 lıtr qaımaq jáne 30 kg irimshik ákeldim. Jarty saǵatta ótip ketti. Osylaısha saýdamen aınalysyp júrenime 10 jyl.
Jalpy osy senbide qalanyń, Altyn arman, Dárııa, Karona jáne Qyzyljar bazarlarynda óńirdiń 8 aýdanynan kelgen turǵyndar ónimderin saýdalady. Bul kúni olardyń barlyǵy 5 mln 932 myń teńgeniń taýaryn satqan.
Aleksandr Makeev, Aýyl sharýashylyǵy basqarmasy mal sharýashylyǵy bóliminiń basshysy:
- Búgin sıyr, jylqy, qus, shoshqa jáne qoı eti ákelingen. Sút jáne sút ónimderi men kartop jaqsy ótýde. Qazir Qyzyljar bazarynda 2 bas sıyr eti, 4 bas shoshqa, 6 bas qoı eti men bir bas jylqy ákelindi.
Jyl basynan oblys ortalyǵynda 127 aýylsharýashylyq jármeńkesi ótip, 195,5 mln teńgeniń taýary saýdalanǵan, dep habarlady mtrk.kz.
