Petropavlda keı úılerge jylý berý keshiktirilip jatyr
PETROPAVL. KAZINFORM – Jylý berýshi kompanııanyń málimetinshe, Petropavlda 1184 kópqabatty úı bolsa, sonyń úsheýi áli júıege qosylǵan joq.
Gorkıı kóshesindegi 12 úıge jylý 3 qazanda berilgenimen, kóp uzamaı qaıta sóndirilgen. Sondaı-aq turǵyndar osy kúnge deıin ystyq sýsyz otyrdy.
- Bul úı memlekettik baǵdarlamamen byltyr qarashada paıdalanýǵa berildi, kepildikte tur. Merdiger uıym jylý berýshi mamandarmen birlesip, jylytý júıesin qalpyna keltirdi. Ystyq sý da túske deıin berildi. Jylý berý barysynda júıede aýa jınalyp qalǵan eken. Aıta ketý kerek, úı ishindegi ınjenerlik jeliler menshik ıeleri birlestigi nemese menshik ıeleri kooperatıviniń qaramaǵynda. Sondyqtan qyzmet kórsetýshi uıym jylytý maýsymyna aldyn ala daıyndalýy qajet, - deıdi Petropavl qalasy ákiminiń baspasóz hatshysy Tımýr Jumanov.
Petropavldaǵy Batyr Baıan, 3 mekenjaıyndaǵy 9 qabatty úı turǵyndarynyń aıtýynsha, munda jylý 2 qazan berilgen, biraq páterler salqyn.
- Bul úıge kóship kelgenime úsh jyl boldy, másele jylda qaıtalanady. Qazir páterdiń jartysynda jylý bar, as úı men tórgi bólmeniń batareıalary muzdaı. Mundaı jaǵdaı mende ǵana emes. PIK tóraǵasy «qysym durys berilmeıdi» deıdi. Byltyr «109» nómirine habarlasyp, komıssııa kelip, birden jylý berilgen edi. Bıyl kúnde erteń dep shyǵaryp salady, - deıdi úı turǵyny Tatıana Davydenko.
«SEVKAZENERGO» AQ baspasóz qyzmetiniń málimetinshe, kóptegen úı qysqa durys ázirlenbegen. Saldarynan ishki júıesinde másele týyndap jatyr.
- Jazdy ótkizip alyp, jylytý júıesin, qubyrlardy endi aýystyryp jatqandar bar. Keı páterlerde qubyrlar plastıkke almastyrylǵan, durys ornatylmaǵan, munyń bári jalpy úıdiń jylytý júıesine áser etip jatyr. Máseleni baspanaǵa qyzmet kórsetýshi uıymdar sheshýi kerek, – deıdi kompanııanyń baspasóz hatshysy Dınara Hodjaeva.
Arqany keńge salýǵa bolmaıdy. «Qazgıdromet» kásiporny oblystyq fılıalynyń málimetinshe, qazan aıynyń birinshi onkúndiginde kún jylyp, keı jerlerde synap baǵanasy +13 gradýsqa deıin kóteriledi. Túnde -2-ge deıin kún sýytady. Qubylmaly aýa raıy ekinshi onkúndikte de saqtalady. Túnde synap baǵanasy -5 gradýsqa deıin túsip, kúndiz +10 gradýsqa deıin jylynbaq.
Al qazan aıynyń sońyna qaraı kún sýytyp, túnde -10, kúndiz -5 gradýs bolady dep boljanǵan. Qar aralas jańbyr jaýyp, arty kóktaıǵaqqa ulaspaq.
Buǵan deıin Pavlodar turǵyndary jylý jetispeýshiligine shaǵymdanǵanyn jazǵan edik.