Petropavlda keı mektepterde jasandy ıntellekt qoldanylyp jatyr
PETROPAVL. KAZINFORM — Petropavlda mektep ustazdary zaman aǵymynan qalmaı, jańa tehnologııany óz sabaqtaryna engizip jatyr. Jasandy ıntellektini bilim berýde qoldanyp júrgen muǵalimniń biri — Ekaterına Statsenko.
Jas ustaz Petropavldaǵy № 9 orta mektepte bastaýysh synypta sabaq beredi.
Ekaterına Statsenkonyń aıtýynsha, neırojeli onyń jumysyn birshama jeńildetken. Oqytý materıaldaryn jasandy ıntellektiniń kómegimen ár oqýshynyń ereksheligin eskerip, beıimdeýge bolady.
Sonyń ishinde balalarǵa ózindik jumys retinde taratylatyn kartalardyń búkil mazmunyn qurastyryp beredi. Bul — bilimdi tez uǵýǵa jáne balanyń oqýǵa degen qyzyǵýshylyǵyn joǵaltpaýǵa sep.
«Mektepte jumys istep jatqanyma 5 jyl. Sondaı-aq eki jyldan beri dırektordyń ǵylymı-ádisteme jumysy jóninen orynbasarymyn. Sabaǵymdy qyzyqty etip ótkizýge tyrysamyn, sondyqtan sońǵy kezde jasandy ıntellektini jıi qoldanyp júrmin. Mysaly, oqýshy óleńdi jaqsy túsinýi úshin neırojeliniń kómegimen oǵan sýretteme jasalady. Jasandy ıntellektini tek ádebıet sabaǵynda ǵana emes, basqa pánderge de qoldanamyn. Biraq, balalarǵa bermes buryn tekserip, keıde azdap túzetip jatamyn. Óıtkeni neırojeli de keıde orfografııalyq qatelikter jiberedi, keıde balanyń jasyn eskermeıdi. Biz oqıtyn baǵdarlamaǵa sáıkes kelmeıtin kezder de bolady», — deıdi bastaýysh synyp muǵalimi.
Ustazdyń aıtýynsha, jasandy ıntellekt muǵalimdi tolyq almastyra almaıdy. Óıtkeni ustaz — oqýshyǵa bilim berip qana qoımaı, psıhologtyń, tárbıeshiniń, keıde syrlas dostyń rólin qatar atqarady.
«Balany jaqsy kórmeıtin adam muǵalim bola almaıdy. Men úshin aldymdaǵy ár oqýshymnyń orny bólek. Neırojelini qoldaný arqyly olardyń sabaqqa degen qyzyǵýshylyǵy artty, erteń ne bolar eken dep mektepke asyǵyp turatyn boldy», — deıdi ustaz.
Ekaterına Statsenko mamandyqtyń shyńyna jetý úshin únemi izdeniste bolý kerek degen pikirde.
«Jasandy ıntellekt týraly qazir aqparat kóp, bastapqyda ózim ınternette qoljetimdi aqparatpen tanysyp, qoldanyp úırendim. Keıin óz sabaqtarynda osy neırojelini qoldanyp júrgen ustazdardyń vebınarlaryna qatystym. Áli de úırenerim kóp», — deıdi bastaýysh synyp muǵalimi Ekaterına Statsenko.
Aıta keteıik, 5 qazanda Qazaqstanda ustazdar kúni atalyp ótedi.
Byltyr alǵash ret Muǵalimder kúni merekesi 5 qazanda merekelendi. Tıisti qaýlyny QR Úkimeti bıyl 10 naýryzda qabyldaǵan bolatyn edi.
Memlekettik merekeler tizimine sáıkes, osy ýaqytqa deıin respýblıkada Muǵalimder kúni qazan aıynyń birinshi jeksenbisinde toılanyp keldi.
Endi bul mereke 5 qazanda álemniń 100-den astam eli atap ótetin Dúnıejúzilik muǵalimder kúnimen sáıkestendirildi.
