Petropavlda kene men masaǵa qarsy dárileý jumystary bastaldy
PETROPAVL. KAZINFORM – Soltústik Qazaqstan oblysynda sáýir aıynda kene shaqqan 138 adam dárigerge kóringen.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, zardap shekkenderdiń 45-i – 14 jasqa deıingi bala.
– Kenelerdiń belsendilik tanytatyn kezeńi qazan aıyna deıin jalǵasady. Bul jándikter kene entsefalıti, kene súzegi, kene borrelıozy (Laım aýrýy), gemorragııalyq qyzba jáne t.b. sııaqty kóptegen juqpaly aýrýdyń qozdyrǵyshtary retinde qaýipti. Eń qaýiptileriniń biri – kene vırýstyq entsefalıti. Kene entsefalıti – ortalyq júıke júıesin zaqymdaıtyn jiti ınfektsııalyq aýrý. Aýrýdyń saldarynan adam múgedek bolyp qalýy nemese til tartpaı ketýi múmkin, - deıdi mamandar.
Profılaktıkalyq sharalardyń biri – jumysy kene entsefalıtiniń tabıǵı oshaǵynda bolýymen baılanysty adamdardyń profılaktıkalyq ımmýndaýdan ótýi.
Memlekettik tapsyrys aıasynda sáýir aıynda Aıyrtaý aýdanynyń Aıyrtaý jáne Lobanovo aýyldarynda kenege qarsy dezınsektsııalyq is-sharalar ótkizilgen, sondaı-aq osy jyldyń qyrkúıeginde qaıta ótkizý josparlanǵan.
Petropavlda da kenemen ǵana emes, masamen de kúres bastalyp ketti. Qalalyq turǵyn úı-kommýnaldyq sharýashylyǵy, jolaýshylar kóligi jáne avtomobılder joldary bólimi baspasóz qyzmetiniń málimetinshe, bıyl 600 ga aýmaqta dezınsektsııa júrgiziledi.
– Oblys ortalyǵynda aýa raıyna baılanysty merdiger jumysty bastady. Sanıtarııalyq-epıdemıologııalyq baqylaý departamenti usynǵan preparattarmen dezınsektsııa júrgizilip jatyr. Aýmaqty óńdeý úshin mehanıkalyq búrikkishter qoldanylady, bul óńdeletin aýmaqtarda preparattardyń birkelki taralýyn qamtamasyz etedi. Jumystar adamdardyń kóp shoǵyrlanatyn oryndarynda, ıaǵnı, qalanyń saıabaqtary men alańdarynda, ortalyq kóshelerde júrgiziledi. Dezınsektsııa túngi ýaqytta, kóshede adamdar sany az bolǵan kezde júrgiziledi, - dedi bólimniń baspasóz hatshysy Berdimurat Baımuqan.
Buǵan deıin SQO-da aýyl balasy ákimdikten oıyn alańyn jóndep berýdi suraǵanyn jazǵan edik.