Petropavlda kelinshek 1944 jylǵy nagandy úıinde zańsyz saqtaǵan
PETROPAVL. QazAqparat – Petropavlda polıtseıler 29 jastaǵy áıeldiń úıinen zańsyz saqtalǵan nagandy tárkiledi, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldyń 29 jastaǵy turǵyny 1944 jyly jasalǵan nagan júıesindegi revolverdi jáne onyń alty patronyn úıinde zańsyz saqtap kelgen. Muny krımınaldyq polıtsııa qyzmetkerleri jedel is-shara barysynda anyqtady. Qarý tárkilendi.
Saraptama qarýdyń atysqa jaramdylyǵyn kórsetti.
Bul derek Sotqa deıingi tergep-tekserýdiń biryńǵaı tizilimine «Qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý» baby boıynsha engizildi. Kúdiktige qatysty mindetti túrde kelý bultartpaý sharasy qoldanyldy. Tártip saqshylary osy istiń anyq-qanyǵyna jetý úshin tıisti sharalardy qolǵa aldy.
«QR Qylmystyq kodeksiniń 287-babynyń úshinshi bóligimen atys qarýyn zańsyz saqtap, qoldanǵandarǵa (tegis uńǵyly ańshy qarýyn qospaǵanda) qylmystyq jaýapkershilik qarastyrylǵan. Zańsyz saqtalǵan qarýdy erikti túrde tapsyrǵan adamnyń ony qylmysqa qoldanǵany anyqtalmaǵan jaǵdaıda qylmystyq jaýapkershilikten bosatylatyndyǵyn esterińizge salamyz», - deıdi SQO PD Krımınaldyq polıtsııa basqarmasynyń bólim bastyǵy Murat Baýkenov.
