Petropavlda «KazRoboSport-2018» halyqaralyq chempıonaty ótip jatyr
PETROPAVL. QazAqparat - Tuńǵysh Prezıdent kúni qarsańynda Petropavlda «KazRoboSport-2018» halyqaralyq chempıonatynyń aqtyq kezeńi ótip jatyr, dep habarlaıdy QazAqparat.
Tennıs ortalyǵy jáne Oqýshylar saraıynda Qazaqstan boıynsha óńirlik irikteý týrynan ótken 200-den asa qatysýshy jáne Qyrǵyzstan, Ózbekstan, Reseı elderiniń sportshylary eki kún boıy jarysady. Jalpy 16 qurama robosporttyń 6 túri boıynsha synǵa túsedi. Ol - robot-sýmmoshylar, robofýtbol, estafeta, labırınt syndy túrlerden turady. Qatysýshylardyń jas ereksheligi 10 jáne 21 jas aralyǵynda, ár komanda 2 top múshesinen quralǵan. Munda da klassıkalyq sporttaǵydaı komandalyq rýh, shapshańdylyq jáne jumystyń sapalyǵy eskeriledi.
«Bıylǵy chempıonattyń ereksheligi - negizgi qatysýshylardan bólek mektepke deıingi bilim berý ortalyǵy, atap aıtqanda Petropavl qalasynyń «Altyn besik» balabaqshasynyń tárbıelenýshileri baqtaryn synaıdy jáne alǵash ret múmkindigi shekteýli jan - qulaǵynyń estý kemistigi bar búldirshin qatysady, ıaǵnı ınklıýzııa ádisin qoldanbaqpyz. Olar bólek baǵalanatyn bolady»,- deıdi «Kazrobotıks» federatsııasynyń dırektory Aıjan Jekeeva.
Halyqaralyq festıval qatysýshylarynyń aldynda sóz sóılegen oblys ákimi Qumar Aqsaqalov Qazaqstanda balalardy jan-jaqty damytý úshin bar jaǵdaı jasalǵanyn atap ótti.
«Elbasy árqashanda tabıǵı resýrstardy emes, bilimdi meńgergen elderdiń bolashaǵy zor dep aıtady. Búginde elimizde óskeleń urpaqtyń zamanaýı bilimmen qamtamasyz etilýine kóp jaǵdaı jasalǵan. Robosport festıvalin IT-tehnologııalar salasynda ǵylymnyń, ozyq oılar men shyǵarmashylyqtyń damýyna arnalǵan alǵashqy baspaldaq dep aıtýǵa bolady. Biz robototehnıka chempıonatynyń ótkizilýin qoldaımyz. Bul sharanyń balalarymyzdyń bolashaǵyna qosar úlesi zor. Petropavlda mundaı birinshilikterdi jıi ótkizip turý kerek», - dedi Qumar Aqsaqalov.
Elimizde robofestıval 2016 jyldan beri uıymdastyrylyp keledi. Byltyr daryndy balalar Aqtóbe qalasynda bas qosty. Bıyl dástúrli chempıonattyń Petropavlda, jańa oqýshylar saraıynda ótkizilýi kezdeısoq emes. Bul barlyq talaptarǵa jaýap beretin, álemdegi ozyq IT-tehnologııamen jabdyqtalǵan zamanaýı nysan. Oqýshylar saraıy robototehnıka, bıotehnologııa, mehatronıka jáne 3D prototıpteýdiń ortalyǵyna aınaldy. Balalar ortalyǵynda qosymsha bilim berýdiń sońǵy úlgidegi ǵylymı jetistikteri jınalǵan. Oqýshylar saraıy zamanaýı zerthanalarmen de qamtamasyz etilgen.
