Petropavlda qazan aıynda 2-JEO murjasynyń qurylysy bastalady
PETROPAVL. QazAqparat – Petropavlda qazan aıynda 2-jylý-elektr ortalyǵynyń №1 tútin murjasynyń qurylysy bastalady. Shahardyń jańa ákimi Rýslan Anbaev nysanǵa baryp, jylytý maýysymyna daıyndyqty kórdi, dep habarlaıdy QazAqparat tilshisi.
Petropavldaǵy jylý-elektr ortalyǵynda jylytý maýsymyna daıyndyq qyzǵan. Bul oblys ortalyǵynyń jańa ákimi barǵan alǵashqy nysan boldy.
«Arnaıy baryp jumys barysymen tanystym. Birer kún buryn 2-shi tútin murjasy iske qosyldy. Qazir ol qalypty rejımde jumys istep tur. Búginde mamandar ortalyqtaǵy qazandyqtardy jylytý maýsymyna ázirlep jatyr. Qala turǵyndaryn ystyq sýmen úzdiksiz qamtamasyz etý úshin 3 qazandyq istep tur. Jylytý maýsymy bastalysymen taǵy tórteýi qosylady jáne qarasha aıynda olardyń jalpy sany 11-ge deıin jetpek», - dedi Petropavl ákimi Rýslan Anbaev.
Sondaı-aq bıyl №1 tútin murjasynyń qurylysy bastalmaq.
«Joba daıyn. Qazan aıynda murjanyń irgetasy qalanyp, kelesi jyldyń sáýirinde murjanyń salyna bastaıdy. Sharýaǵa jaýapty merdigerler dál osyndaı jobany Pavlodar qalasynda júzege asyryp jatyr. Aıta ketý qajet, qulaǵan murjanyń demontajy qurylysqa esh kedergi jasamaıdy», - dedi Rýslan Anbaev.
Qazirgi ýaqytta eski №1 tútin murjasy buzylyp alynyp jatyr. Qala ákiminiń aıtýynsha, bul jumys ta, jańa nysannyń qurylysy da jylytý maýsymyna esh áserin tıgizbeıdi.
Esterińizge salaıyq, 20 naýryzda Petropavldaǵy jylý-elektr ortalyǵynyń tútin murjasy jartylaı opyrylyp qulaǵan edi. Saldarynan jumysshy áıel mert boldy.
Al oblys ortalyǵynda turǵyndar páterleriniń sýyp ketkenine shaǵymdandy.
Keıin osy kásiporynnyń birneshe basshysy qamaýǵa alynyp, qylmystyq is qozǵaldy.
SQO ákimi ortalyqtyń jartylaı qulaǵan murjasy tolyq buzylyp alynatynyn aıtty.
Sondaı-aq, Energetıka mınıstri Bolat Aqsholaqov Petropavldaǵy murjasy qulaǵan 2-JEO-da bolyp, nysandy kúrdeli jóndeýge 17,5 mlrd teńge qajet ekenin aıtty.
Al, jýyrda «Sevkazenergo» AQ tútin murjasyn bólshekteýge nege úsh adamnyń ǵana jumyldyrylǵanyna túsinik berdi.
Petropavlda 2-jylý-elektr ortalyǵyndaǵy apatqa baılanysty jergilikti aýqymdaǵy tehnogendik sıpattaǵy tótenshe jaǵdaı jarııalaý týraly sheshim qabyldandy.
Shilde aıynyń sońynda QR Energetıka mınıstrliginiń komıssııasy jumysyn aıaqtap, Petropavldaǵy 2-jylý-elektr ortalyǵy murjasynyń neden qulaǵanyn anyqtady.
