Petropavlda Qazaqstan men Reseıdiń týrıstik kórmesi ashyldy
PETROPAVL. QazAqparat - Soltústik Qazaqstan oblysynda «Qazaqstan men Reseıdegi týrızmdi damytýdyń jańa tásilderi men tendentsııalary» atty týrıstik kórme ashyldy, dep habarlaıdy QazAqparat tilshisi.
Kórme XV Qazaqstan men Reseı aımaqaralyq yntymaqtastyq forýmynyń aıasynda ótip jatyr. Bıylǵy forým týrızmdi damytýǵa arnalǵan. Kórmede 40-tan astam eksponat óz óńirleriniń erekshelikterimen tanystyrady.
Saltanatty is-sharanyń ashylýyna Soltústik Qazaqstan oblysynyń ákimi Qumar Aqsaqalov, QR Mádenıet jáne sport mınıstri Arystanbek Muhamedıuly, RF Týrızm boıynsha federaldyq agenttik basshysy Oleg Safonov qatysty.
Q.Aqsaqalov kórmege qatysýshylardy qarsy alyp, óńir úshin XV Qazaqstan men Reseıdiń aımaqaralyq yntymaqtastyq forýmyn ótkizý úlken mártebe ekenin atap ótti.
«Forýmnyń taqyryby úlken ıntegratsııalyq potentsıalǵa ıe. Ár óńirde týrısterdi tańǵaldyratyn oryn bar. Bizdiń oblystaǵy erekshe aımaq - Imantaý-Shalqar kýrorty. Óńirge týrıster kóptep kelýi úshin bar kúsh-jigerimizdi salýymyz kerek. Bizde emdik qasıetke ıe eki kól bar. Búgin jáne erteń týrıstik aǵynnyń artýy úshin taǵy ne isteı alatynymyzdy talqylaımyz», - dedi Q.Aqsaqalov.
Oleg Safonov Qazaqstan men Reseı yntymaqtastyǵy zor strategııalyq mánge ıe ekenin tilge tıek etti.
«Eki eldiń dostyq qatynasy men ekonomıkalyq baılanysynda týrızmniń mańyzy erekshe. Bul qýantady. Týrızm halyq sharýashylyǵynyń 53 salasyn damytýǵa yqpal etedi jáne sınergetıkalyq áseri orasan. Jyl saıyn RF-ǵa 3,5 mln qazaqstandyq keledi, 3 mln-nan astam reseılik Qazaqstanǵa saıahattaıdy. Bul tsıfrlar únemi ósip otyrýǵa tıis. Bizde týrızmdi damytý úshin múmkindikter zor», - dep atap ótti O.Safonov.
Petropavlda «Qazaqstan men Reseıdegi týrızmdi damytýdyń jańa tásilderi men tendentsııalary» kórmesi 8-9 qarasha kúnderi jumys isteıdi.
