Petropavlda qazaq teatrynyń jańa ǵımaraty paıdalanýǵa berildi
Petropavldaǵy qara shańyraq – Sábıt Muqanov atyndaǵy oblystyq qazaq sazdy-drama teatry ujymy jańa ǵımaratqa kóshti. Óner ordasynyń ashylý saltanatyna Qazaqstan Respýblıkasynyń Mádenıet jáne sport mınıstri Dáýren Abaev pen óńir basshysy Qumar Aqsaqalov qatysty.
Saltanatty is-sharada sóz alǵan óńir basshysy bıyl oblysta mádenıet salasy qyzmetkerlerine arnalyp turǵyn úı salyna bastaǵanyn, bul joba sala mamandaryn qoldaý maqsatynda alǵash ret qolǵa alynǵanyn atap ótti. Dáýren Abaev jınalǵan jurtshylyqty jańa nysannyń ashylýymen quttyqtaı kele Qyzyljarda mádenıet salasy mamandaryn daıarlaýdy kózdeıtin Qazaq ulttyq óner ýnıversıtetiniń fılıalyn ashý qajettigin aıtty.
Óner ordasynyń ashylý saltanatynan keıin teatr ujymy meımandar men kórermender nazaryna Sábıt Muqanovtyń «Shoqan» tarıhı dramasyn usyndy.
Jas órken jańa yqshamaýdanynda 2018 jyly qurylysy bastalǵan nysan 2019 jyly paıdalanýǵa berilýi tıis edi. Merdiger óz mindettemelerin ýaqytynda oryndamaı, qurylysshy kompanııany aýystyrýǵa týra keldi. Saldarynan mundaǵy jumys bir jyl boıy toqtap turdy.
Teatr zaman talabyna saı salynǵan, dızaıni neoklassıka stılinde jasalǵan. Zal 500 orynǵa arnalǵan. Mármárdan jasalǵan baspaldaq ǵımarattyń kórkin asha túsken. Endi oblystaǵy úlken jıyndardyń barlyǵy osy jerde ótedi. Jańa nysandy salýǵa bıýdjetten 5 mlrd teńgege jýyq qarajat bólindi. Nysannyń aýmaǵy 15 myń sharshy metr.
