Petropavlda qazaq mektep-gımnazııasyna Abaı esimi berildi
Petropavldaǵy 19-yqsham aýdanda ornalasqan qazaq mektep-gımnazııasyna Abaı esimi berildi. Asqar Mamın keshe Úkimettiń qaýlysyna qol qoıdy.
Abaı atyndaǵy qazaq mektep-gımnazııasy 2007 jyly boı kóterdi. 1100 balaǵa shaqtalǵan bilim ordasynda búginde 1046 oqýshy oqıdy. Daıarlyq synyptary, 50 balaǵa shaqtalǵan shaǵyn ortalyq jumys isteıdi. Mektepke Abaı esiminiń berilýimen endi oqý baǵdarlamasyna biraz ózgeris engizilmek.
«Biz bul habardy bir jylǵa tarta kúttik. Pandemııaǵa baılanysty sozylyp ketti. Respýblıkadaǵy Abaı mektepteriniń jelisine kirip otyrǵan 17-shi mekteppiz. Abaı esiminiń berilýi bizge zor jaýapkershilik artady. Árıne, qazaq tili men ádebıetin tereńdete oqytatyn bolamyz. Qazir bul pánderge aptasyna 3 saǵat qana berilse, ony jańa oqý jylynda eki ese arttyramyz», - deıdi Abaı atyndaǵy qazaq mektep-gımnazııasynyń dırektory Bulbul Ahmadıqyzy.
Bıyl sáýir aıynda bilim ordasynda Abaı ortalyǵy ashyldy. Ol 6 bólimnen turady. Munda qazaqtyń mádenıetin pash etetin mýzeı ashylǵan. Ortalyqta mamandar daryndy balalarmen jumys isteıdi. Sondaı-aq, QR-kody bar arnaıy stend arqyly elimizdegi Abaı murajaılarymen tanysýǵa bolady.
SQO Bilim basqarmasynyń málimetinshe, bıyl óńirde taǵy eki mekteptiń ataýy ózgerdi. Býlaev qalasyndaǵy №4 orta mektepke Maǵjan Jumabaevtyń esimi berilse, Jambyl aýdany Presnovka eldimekenindegi jalpy bilim beretin orta mektep endi Qojabergen jyraý esimimen atalady.
