Petropavlda qazaq kúresinen Qojabergen jyraý atyndaǵy respýblıkalyq týrnır ótip jatyr

PETROPAVL. KAZINFORM — Petropavlda qazaq kúresinen ótip jatqan respýblıkalyq týrnırge 320 sportshy qatysyp jatyr.

Soltústik Qazaqstan oblysy dene shynyqtyrý jáne sport basqarmasy baspasóz qyzmetiniń málimetinshe, jarysta jergilikti jáne elimizdiń 10 aımaǵynan kelgen balýandar 10 salmaq dárejesi boıynsha kúsh synasady. 

Jarys 2010 jáne 2011 jyly týǵan jasóspirimder arasynda uıymdastyrylǵan. 

— Týrnır eki kúnge shaqtalǵan. Jeńimpazdar QR sport sheberine úmitker ataǵyna ıe bolady. Bul týrnır bıyl jetinshi ret ótedi. Qazaq kúresin óńirde damytý maqsat etilgen. Kelgen balýandardyń arasynda el chempıondary da bar, — deıdi qazaq kúresinen SQO-nyń jasóspirimder arasynda aǵa jattyqtyrýshysy Asylhan Bolatov.

Jarystyń alǵashqy kúni balýandar 38, 46, 55, 65 jáne 75 keli salmaq dárejeleri boıynsha kúresti. 

Petropavldyq balýan Aıdarbek Bulanovtyń kúrespen aınalysyp júrgenine 3 jyl. 

— Jarysqa kóp daıyndaldym. Buǵan deıin Astanada ótken Super Cup degen jarysqa qatysyp, ekinshi oryn aldym, sosyn chempıondar lıgasyna qatystym. Búgin aqmolalyq balýanmen beldestim. Myqty sportshy eken, ári kilemge qobaljyp shyqtym, saldarynan jeńilip qaldym, — deıdi Aıdarbek Bulanov.

Qojabergen Jyraý — ataqty qolbasshy, shejireshi, jyraý, aqyn. Buǵan deıin halyq áni bolyp kelgen «Elim-aı» dastanynyń avtory.

Uıymdastyrýshylardyń aıtýynsha, bul doda — jaı ǵana sporttyq saıys emes, uly jyraýdyń rýhyna taǵzym, ónerine kórsetilgen qurmet.

Jarys 15 naýryzda aıaqtalady.

Buǵan deıin kúres túrlerinen Azııa chempıonatyna baratyn Qazaqstan quramasy anyqtalǵanyn jazǵan edik.