Petropavlda qazaq kúresinen el chempıonaty ótip jatyr
PETROPAVL. QazAqparat - Petropavlda 18 jastan asqan erler men áıelder arasynda qazaq kúresinen el chempıonaty bastaldy. Dúbirli doda A.Vınokýrov atyndaǵy sport saraıynda ótip jatyr, dep habarlaıdy QazAqparat.
El chempıonatyna qatysyp, baǵy men babyn synaýǵa ár aımaqtan 300-ge tarta balýan keldi. Olar úsh kún boıy boz kilemde ózara myqtyny anyqtamaq. Al, júzden júırik shyqqandar respýblıkalyq quramaǵa qabyldanyp, álem chempıonatyna joldama alady.
Jarystyń alǵashqy kúni boz kilemge balýan qyzdar shyqty. Olar 7 salmaq dárejesi boıynsha synǵa tústi. Elimizdiń túkpir-túkpirinen kelgen kil myqtylar jeńis jolynda aıanyp qalmady. 70 keli salmaq dárejesinde kúresken shyǵysqazaqstandyq Talshyn Jumataeva úshin jarys sátti ótti. Ol barlyq qarsylastarynan basym túsip, jeńiske jetti.
«Kóp daıyndaldym. Jáne de ózimniń jattyqtyrýshylaryma kóp rahmet aıtamyn. Sol kisilerdiń kóp eńbegi sińdi maǵan. Kóp úmit artty. Úsh beldesý ótkizdim. Ekinshi beldesýim qıyn boldy. Bul jeńisti kóp kúttim shynynda. Qýanyshtymyn óte», -deıdi shyǵysqazaqstandyq balýan Talshyn Jumataeva.
«Bıylǵy jarysta tórelik etýde biraz ózgeshelikter bar. Shyny kerek ortada baıaǵyda 3 tóreshi bolatyn. Qaptaldaǵy tóreshi jáne kilem jetekshisi bar. Qazir bizde ortada jalǵyz tóreshi júr. Jáne bizde komanda jetekshileri sekýndanttardy shaqyrady.Ózderińiz kórip otyrǵandaı burynǵydaı sport kostıýmimen emes, tek qana kostıým shalbarmen ǵana tórelik etýge shaqyryp jatyrmyz»,- deıdi jarystyń bas tóreshisi Shalqar Jolamanov.
El chempıonatynyń saltanatty ashylýy erteń, 14-qarashada saǵat 12:00-de ótedi. Keıin boz kilemge erler shyǵady. Jalpy, jarys 3 kúnge josparlanǵan.
