Petropavlda qazaq kınosynyń aptalyǵy bastaldy
PETROPAVL. KAZINFORM — «Ulttyq kınony qoldaý» memlekettik ortalyǵy qazaq kınosyn nasıhattaý maqsatynda Petropavlda qazaq kınosynyń aptalyǵyn bastady.
Uıymdastyrýshylardyń aıtýynsha, buǵan deıin Qaraǵandy jáne Jambyl oblystarynda ótken is-shara barysynda kórermen nazaryna on fılm usynylady.
— Ulttyq kınony qoldaý ortalyǵy aımaqtarda Qazaq kınosynyń kúnderin ótkizýdi qolǵa alǵan bolatyn. Ondaǵy maqsat — QR Mádenıet jáne aqparat mınıstrligi men Kıno ortalyqtyń qoldaýymen túsirilgen fılmderdi halyqqa usyný. Bul — turǵyndardyń el úshin taspalanǵan týyndylarmen tanysýyna jasalǵan qadam. On kúni boıy aımaqta ulttyq kıno kórsetiledi. Aýdandar men aýyldarda da ortalyqtyń kartınalaryn tamashalaýǵa múmkindik bolady. alyp kelgen fılmderdiń janry men mazmuny alýan. Jekeleı jiktesek, «Patrıottar ýaqyty» kınosy quqyq qorǵaýshylardyń eńbegin dáriptese, «Jambyl. Jańa dáýir», «Dos-Muqasan» arqyly tulǵalarymyzdyń júrip ótken jolyna qanyǵýǵa bolady. Al «Baýyryna salý» dep atalatyn kınoda dástúrimiz dáriptelip, ultqa degen súıispenshilik sezimi eselenbek. Kishkentaı kórermenderimizdi de esten shyǵarmaı, «Taıqazan» dep atalatyn balalarǵa arnalǵan anımatsııalyq týyndyny da ala keldik, — deıdi «Ulttyq kınony qoldaý» memlekettik ortalyǵynyń basqarma tóraǵasy Qurmanbek Jumaǵalı.
Kıno ortalyǵynyń qoldaýymen elimizde 117 týyndy jaryq kórgen. Onyń 72-si kórkem, 37-si derekti, al qalǵan 8-i anımatsııalyq fılmder.
Petropavldaǵy aptalyq «Patrıottar ýaqyty» fılmimen ashyldy. Fılmdegi basty rólderdi Sanurjan Súleımenov pen Danııar Alshynov somdady. Sondaı-aq kartınaǵa Dasten Shákirov, Zarına Hadjımetova, Asqar Іlııasov, Saıat Isembaev jáne t. b. talantty akterler túsken.
— Kınony túsirýge shamamen 1 jyldan astam ýaqyt ketti. Qanshama eńbektiń arqasynda fılmimiz kópshiliktiń kóńilinen shyqty dep oılaımyn. Trıller janryndaǵy fılmde dınamıkalyq-ekshn qoldanylǵan, — deıdi fılm rejısseri Serikbol Ótepbergenov.
Qazaq kınosynyń aptalyǵy SQO-da 14 sáýirge deıin jalǵasady.
Buǵan deıin Petropavlda aqsaqaldar bata aıtýdan saıysqa túskenin jazdyq.