Petropavlda qaıyr suraǵan balalardy anyqtaý maqsatynda reıd ótip jatyr
PETROPAVL. QazAqparat – Petropavlda ıývenaldyq polıtseıler jasóspirimder arasynda qaıyr suraý faktilerin anyqtaý maqsatynda reıd ótkizdi, dep habarlaıdy QazAqparat tilshisi.
Soltústik Qazaqstan oblystyq polıtsııa departamenti baspasóz qyzmetiniń málimetinshe, reıdke polıtseılerden bólek barlyq múddeli vedomstvolardyń ókilderi: qalalyq ákimdiktiń kámeletke tolmaǵandar isteri jónindegi komıssııasynyń ókili, prokýratýra qyzmetkerleri, jumyspen qamtý jáne áleýmettik baǵdarlama, bilim bólimderiniń mamandary qatysty.
ıÝvenaldyq polıtsııa bólimshesiniń bastyǵy Elmıra Abýshevanyń sózinshe, kámeletke tolmaǵandar isi jónindegi ınspektorlardyń mindeti – qaıyr suraýǵa ıtermelegen sebep pen saldardy anyqtap, olardy joıýǵa kómektesý.
Reıdke shyqqan top halyq kóp shoǵyrlanǵan «Taıga», «Pıramıda», «Rahmet» saýda úıleriniń, «Altyn Arman» jáne «Kóterme saýda ortalyǵy» bazarlarynyń mańyn, sondaı-aq vokzal mańy alańy men meshit mańyn tekserdi. Nátıjesinde sadaqa jınaıtyn jáshigimen júrgen tórt jasóspirim anyqtaldy.
Polıtseıler balalardyń ata-anasymen habarlasyp, áleýmettik pedagogtardyń jáne prokýratýra qyzmetkeriniń qatysýymen olardan jaýap alyndy. Jasóspirimder aýyr naýqasty balalardyń emine aqsha jınaýmen aınalysatyn qaıyrymdylyq qorynyń azamattyq belsendileri eken. Barlyq qujattary men tıisti kelisimsharty qoldarynda bar.
Jyl basynan beri qalanyń ıývenaldyq polıtsııa qyzmetkerleri 120-dan astam reıdtik is-shara ótkizdi. Nátıjesinde ishki ister organdaryna 743 kámeletke tolmaǵan jasóspirim jetkizildi. Aldaǵy ýaqytta da kámeletke tolmaǵandar isi jónindegi ınspektorlardyń profılaktıkalyq reıdteri jalǵasady.
