Petropavlda qaıta daıarlyqtan ótip, jańa mamandyqty tegin meńgerýge bolady
PETROPAVL. QazAqparat – Petropavl qalasynda 7 oqý orny negizinde qaıta daıarlaý jáne biliktilikti arttyrý kýrstarynan ótýge bolady, dep habarlaıdy QazAqparat tilshisi.
Turǵyndardy jumyspen qamtý ortalyǵynyń málimetinshe, maqsat - «Eńbek» nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan baǵdarlamasyn júzege asyryp, halyqty eńbek naryǵynda suranysqa ıe mamandyqtarǵa oqytý.
Petropavl qalalyq ákimdigi mamandarynyń aıtýynsha, oblys ortalyǵynda 7 oqý orny negizinde qaıta daıarlaý jáne biliktilikti arttyrý kýrstarynan ótýge bolady. Olar: Petropavl qurylys-ekonomıkalyq kolledji, Soltústik Qazaqstandyq kásiptik-pedagogıkalyq kolledji, Gýmanıtarlyq-tehnıkalyq kolledj, Restoratorlar men otelerler qaýymdastyǵy jáne «Shveınyı professıonal», «Radýga» JShS, «Sodel» býhgalterlik fırmasynyń oqytý ortalyqtary.
Petropavl qalasy boıynsha bıyl 420 adam qaıta daıarlyqtan ótýi tıis. Osy maqsatqa respýblıkalyq qazynadan 96,3 mln teńge, jergilikti bıýdjetten 10,6 mln teńge bólingen.
Qala turǵyndary arasynda aspaz mamandyǵy suranysqa ıe – 40 adam meńgerip shyqqan. Kondıterlik kýrsty 30 adam aıaqtasa, elektrgazdánekerleýshiniń sertıfıkaty 25 adamǵa berilgen. Budan basqa petropavldyqtar tiginshi, avtoelektrshi, traktorshy, elektrshi sııaqty kóptegen jumysshy mamandyqtaryn meńgere alady.
Qazirgi tańda qysqa merzimdi kýrstarǵa 332 adam jiberilgen. 245-i oqýyn támamdap, 65-i birden jumysqa ornalastyryldy. Taǵy shamamen 100 adam oqýdy qyrkúıek aıynda bastamaq.
