Petropavlda qatty jelden bir adam jaraqat aldy
PETROPAVL. QazAqparat – Petropavlda daýyl kezinde ushqan qańyltyr qorshaýdan er adam jaraqat aldy, dep habarlaıdy QazAqparat tilshisi.
Soltústik Qazaqstan oblysy densaýlyq saqtaý basqarmasy baspasóz qyzmetiniń málimetinshe, saǵat 16.30-dar shamasynda jedel járdem qyzmetine Petropavldaǵy «Jas Órken» yqsham aýdanyndaǵy Gorkıı-Jabaev kóshelerinde júrip jatqan qurylys alańynan shaqyrtý túsken. Sol jerde jumys istep júrgen 56 jastaǵy er adam qatty daýyldan ushqan qańyltyr qorshaýdan jaraqat alǵan. Saldarynan jumysshynyń buǵanasy syndy. Zardap shegýshi Petropavldaǵy kópsalaly qalalyq jedel medıtsınalyq járdem aýrýhanasyna jetkizildi. Mamandardyń aıtýynsha, jaǵdaıy ortasha, tıisti em jasalyp jatyr.
Petropavl qalalyq ákimdigi keltirilgen shyǵyndy eseptep jatyr. Qatty daýyldan ortalyq alańdaǵy flagshtok zaqymdalyp, jalaýdy sheship alýǵa týra keldi.
«Búgin daýyldy eskertý jarııalandy. Jeldiń ekpini sekýndyna 27 metrge jetti. Qatty daýyldan birneshe ǵımaratqa zaqym keldi. Budan basqa qala boıynsha birneshe aǵash qulady. Meıramhanalardyń biriniń jeke avtokólik turaǵynda aǵash qulap, úsh avtokólikti zaqymdady. Qazir kelgen shyǵyn mólsheri eseptelip jatyr. Ýchaskelerdiń jáne ǵımarattardyń ıeleri máseleni azamattyq tártipte sheshedi.
Qazir anyqtap jatyrmyz. Bizdiń bilýimizshe, eki mekteptiń mańynda, birneshe turǵyn úı aýlasynda da aǵashtar qulaǵan. Qazir kommýnaldyq qyzmetter kóshege jınaýǵa shyqty», - deıdi Petropavl qalasy ákiminiń orynbasary Asqar Habıbýlın.
Buǵan deıin Petropavlda kún raıynyń buzylyp, daýyl turǵanyn aıtqan edik. Saldarynan birneshe kólikke aǵash qulap, ǵımarattarǵa zaqym keldi. Áleýmettik jelide sondaı-aq qatty jelden avtobýs aıaldamasynyń synǵan beınejazbasy tarady.
«Qazgıdromet» RMK SQO boıynsha fılıal mamandary aýa raıynyń buzylýyna Reseıden kelgen tsıklonnyń áser etkenin aıtty. Búgin túnde óńirde synap baǵanasy -6 gradýsqa deıin tómendemek. Sondaı-aq erteń 7 mamyr da qolaısyz aýa raıy saqtalyp, daýyl bolady dep eskertý jarııalandy.
