Petropavlda qatty daýyldan kólik ústine aǵash qulap, ǵımarattyń shatyry julyndy
PETROPAVL. QazAqparat – Petropavlda qatty daýyl saldarynan kólik ústine aǵash qulap, Bereke yqsham aýdanynda ǵımarattyń shatyry julyndy, dep habarlaıdy QazAqparat tilshisi.
Búgin 112 qyzmeti Soltústik Qazaqstan oblysy aýmaǵynda ekpini sekýndyna 15-20 metrge deıin jetetin daýyl turatyndyǵy jóninde eskertken bolatyn. Petropavlda aýa raıy túske qaraı kúrt buzyldy. Qatty daýyl aǵash butaqtaryn syndyryp qana qoımaı, birneshe ǵımaratty zaqymdady.
Áleýmettik jelide birneshe beınejazba da tarady. Kýágerlerdiń aıtýynsha, oblys ortalyǵyndaǵy «Qazaqtelekom» ǵımaraty zaqymdanǵan . Bereke yqsham aýdanynda salynyp jatqan saýda úıiniń shatyryn julyp ketken. Al, ortalyq kóshelerdiń birinde eki kóliktiń ústine aǵash qulap ketti . Ázirge daýyldan kelgen zalaldyń naqty kólemi belgisiz.
«Qazgıdromet» RMK SQO fılıaly mamandarynyń aıtýynsha, óńirdiń barlyq aýdandarynda daýyl turady. M. Jumabaev aýdany Vozvyshenka eldi mekeninde jáne Ýálıhanov aýdanynyń Kishkenekóz eldi mekeninde jeldiń ekpini 23 m/s deıin jetip, kórý aımaǵy 200-500 metrden aspady. Sınoptıkter 7 mamyrǵa da daýyldy eskertý jarııalady.
