Petropavlda kásipkerdiń kinásinen 28 myńnan astam abonent birneshe saǵat jaryqsyz otyrdy
PETROPAVL. KAZINFORM — Petropavldaǵy Ǵ.Músirepov kóshesinde ornalasqan elektr taratý jelisi osy aıda tórtinshi ret úzilgen.
«Sevkazenergo» AQ baspasóz qyzmetiniń málimetinshe, 110 kV áýelik elektr jelisi kezekti ret zaqymdanǵandyqtan elektrmen jabdyqtaýdy shekteýge týra kelgen. Turǵyndardan bólek áleýmettik nysandarda — aýrýhanalarda, mektepter men balabaqshalarda da jaryq sóndirildi. Qazirgi ýaqytta apattyq qyzmet tutynýshylardy basqa jelige qosty. Úzilgen symdy qalpyna keltiretin bolady.
Mamandardyń aıtýynsha, elektr jelisiniń bul joly zaqymdanýyna qorǵalatyn aýmaqta energetıkalyq kompanııamen kelisilmeı aýyr júk kóligimen jer tógý jumystarynyń ruqsatsyz júrgizilýi sebep bolǵan. Buǵan deıin, 27 mamyr kúni dál osy aýdanda qaýipsizdik talaptarynyń saqtalmaýy saldarynan 110 kV áýelik jeli zaqymdaldy jáne júk kóliginiń dóńgelekteri jarylǵan.
«Soltústik Qazaqstan Elektrjelistik Taratý kompanııasy» AQ qala turǵyndarynan osy qolaısyzdyq úshin keshirim surady. Kompanııa ókilderi apattyń energetıkterdiń kinásinen emes, qorǵaý aımaǵynda jumys júrgizgen kásipkerdiń jaýapsyz áreketine baılanysty ekenin eske saldy. Barlyq tehnologııalyq buzý faktileri tıisti aktilermen rásimdelip, Atomdyq jáne energetıkalyq qadaǵalaý men baqylaý komıtetine, prokýratýraǵa jáne basqa da baqylaýshy organdarǵa resmı túrde joldanatyn bolady.
— Áýelik elektr jelileriniń qorǵaý aımaqtarynda qandaı da bir jumystardy energetıkalyq kompanııamen kelispeı júrgizýge qatań tyıym salynady. Elektr qondyrǵylary men qorǵaý aımaqtarynyń paıdalaný erejelerin buzý elektr jelisinen jappaı ajyratýǵa sebep bolyp, adamdardyń ómirine qaýip tóndiredi. Infraqurylymǵa zııan keltirgen tulǵalar Qazaqstan Respýblıkasynyń zańnamasyna sáıkes jaýapkershilikke tartylady, — delingen baspasóz habarlamasynda.
Buǵan deıin Petropavldaǵy JEO-2-niń jańa tútin murjasy bıyl iske qosylatyndyǵyn jazǵan edik.