Petropavlda kásiporynnan órt shyqty
PETROPAVL. QazAqparat – Petropavldaǵy «Radýga» JShS tsehtarynyń birinen órt shyǵyp, órt sóndirýshilerge úshinshi deńgeıli shaqyrtý boıynsha jumys isteýge týra keldi, dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, «Radýga» JShS-niń óndiristik nysandarynyń birinen órt shyqqany jóninde habarlama saǵat 7.00 shamasynda túsken.
Órt sóndirýshiler oqıǵa ornyna kelgende tseh qoıý tútinge oranyp úlgergen eken. Mamandar birden iske kirisip, «Nıva» kóligin angardyń ishinen shyǵardy. Shamamen 40 mınýttyń ishinde órt tolyǵymen sóndirildi.
«Radýga» JShS-de granýla jasaıtyn stanok isten shyǵyp, elektr symdarynan órt tutanǵan. Úshinshi nómirli, ıaǵnı joǵary qaýipti shaqyrý boıynsha jumys istedik. Óıtkeni bildek turǵan ǵımarattyń aýmaǵy 1,5 myń sharshy metr. Jalynnyń ári qaraı jaıylýyna jol bermeı, tez qımyldaý kerek boldy. Nátıjesinde bir bildek qana janyp ketti. Zardap shekkender, qaza tapqandar joq. Shyǵyn mólsheri anyqtalatyn bolady», - deıdi Petropavl qalalyq tótenshe jaǵdaılar basqarmasynyń bastyǵy Vladımır Hýtınaev.
Mamannyń aıtýynsha, Petropavlda jyl bastalǵaly 10 órt tirkeldi, bul ótken jylmen salystyrǵanda 40 %-ǵa az. Sondaı-aq qańtar aıynda ólim-jitim bolǵan joq. Ótken jyly bir adam qaza tapty. Órtterdiń basym bóligi jylytý qondyrǵylarynyń durys istemeýinen shyǵady.
Al búgin Petropavldaǵy J.Jabaev kóshesi, 151 úıde ornalasqan «Faraon» dámhanasynda órt shyqty. Shaqyrtý saǵat 11.37 mınýt ketkende túsken. Órt mangaldyń jeldetý qubyrynda turyp qalǵan maıdan shyqqan. Mamandar jalynnyń taralýyna jol bergen joq.
