Petropavlda kásiporyndar eńbek qaýipsizdigin kúsheıtpek

QR Eńbek jáne halyqty áleýmettik qorǵaý mınıstrliginiń málimeti boıynsha, elimizde jumys oryndarynyń qolaısyzdyǵy el ekonomıkasyna eleýli shyǵyn ákelýde. Jyl saıyn zııandy jumys jaǵdaıynda eńbek etetin 600 myń jumysshyǵa qosymsha ótemaqy retinde 60 mlrd teńge jumsalady eken.

Petropavldaǵy aýyr mashına jasaý zaýytynda shamamen 1000-ǵa jýyq jumysshy bar. 20 paıyzy, ıaǵnı, 220 adam aýaǵa zııandy zattar taraıtyn tsehtarda eńbek etedi. Olardyń qatarynda dánekerleýshiler, ajarlaýshy-syrlaýshylar bar.

«Jalaqyny ósirdik. Eńbek demalysyna kúnder qostyq. Sondaı-aq, ár jumysshyǵa kúndelikti jarty lıtr sút beremiz. Olar eńbektenetin tsehtarda jeldetkishter jumys istep tur», - deıdi «Petropavl aýyr mashına jasaý zaýyty» AQ eńbekti qorǵaý bóliminiń bastyǵy.

Qazaqstanda «Salamatty jumys oryndary» jobasy 2002 jyldan bastap júzege asyp jatyr. Alǵashqylardyń biri bolyp oǵan Shyǵys Qazaqstan jáne Qaraǵandy oblystary qosyldy. Petropavlda atalmysh jobaǵa qatysýǵa bıyl 5 kásiporyn nıet bildirdi. Olar: «Radýga», «Molservıs»,  «Qyzyljar Sý»  jaýapkershiligi shekteýli seriktestikteri,  «ZIKSTO» aktsıonerlik qoǵamy.

«Bizben memorandýmǵa otyrǵan kásiporyndar qaýipti hımııalyq zattarmen jumys isteıdi. Olar óz jumysshylaryna qajetti deńgeıde jaǵdaı jasaǵan. Jyl saıyn medıtsınalyq tekserýlerden ótkizip turady. Sondaı-aq, bul kásiporyndarda dara qorǵanys zattary bar. Jumys oryndary kúrdeli jóndeýden ótkizilip, jeldetý, jaryq júıesi aýystyryldy», deıdi SQO Qoǵamdyq densaýlyqty saqtaý departamentiniń bólim bastyǵy Gúlnara Jaqsylyqova.

Elimizdegi jumysshylardyń 12 paıyzy zııandy óndiriste eńbek etedi. 7000 adam kásibı aýrýmen tirkeýde tur. Bul kórsetkishti azaıtý maqsatynda elimizdiń 10 oblysyndaǵy 108 kásiporyn «Salamatty jumys oryndary» jobasyna qatysyp jatyr.

Avtory: Aqerke Qabykeeva