BQO-da týberkýlez ben brýtsellezge shaldyqqandar sany kóbeıip otyr
ORAL. KAZINFORM — Batys Qazaqstan oblysynda bıylǵy jeti aıda týberkýlezdiń belsendi túrimen 153 naýqastyń aýyrǵany tirkeldi.
BQO sanıtarııalyq-epıdemıologııalyq baqylaý departamenti basshysynyń orynbasary Gúldana Kereevanyń málim etkenindeı, bul ótken jylǵy osy kezeńdegiden (145) kóp.
Gúldana Qaıyrjanqyzynyń sózine qaraǵanda, syrqattanýshylyq oblystyń barlyq aýdanynda anyqtaldy.
Mamannyń aıtýynsha, týberkýlezdiń aldyn alý úshin dúnıege kelgen sábıdi perzenthanada alǵashqy tórt kún aralyǵynda BTsJ vaktsınasymen mindetti túrde vaktsınatsııalaý kerek. Sondaı-aq jylyna bir ret flıýrografııalyq tekserýden ótip turý, salaýatty ómir saltyn ustaný mańyzdy.
Sol sekildi óńirde 17 adamnyń brýtsellez juqtyrǵany (ótken jyly osy merzimde — 13) belgili boldy. Sonyń 9-y Aqjaıyq, tórteýi Báıterek aýdany, eki-ekiden Oral qalasy men Terekti aýdanynda tirkeldi.
— Brýtsellezdiń aldyn alý úshin ruqsat etilmegen jerlerden mal ónimderi men shıkizattaryn satyp almaǵan jón. Mal satyp alǵan kezde veterınarııalyq anyqtamany talap etý artyq bolmaıdy. Oǵan qosa úı janýarlaryn brýtsellez indetine ýaqytyly laboratorııalyq tekserýden ótkizý, oń nátıje anyqtalǵan jaǵdaıda aýrý maldy dereý joıyp, ornyn zararsyzdandyrýdy umytpaý qajet, — dedi Gúldana Kereeva.
Eske sala keteıik, budan buryn BQO-da qyzylshamen aýyrǵandar sany 300-ge jýyqtaǵanyn jazǵan edik.
