Petropavlda qarýdy ýaqytsha saqtaıtyn ortalyqtar ashyldy
Soltústik Qazaqstan oblysy Polıtsııa departamenti baspasóz qyzmetiniń málimetinshe, ańshylar endi shartqa otyryp, qarýlaryn kásibı mamandardyń kúzetine ýaqytsha saqtaýǵa tapsyra alady. Sharttyń talaptary boıynsha ıesi kez kelgen ýaqytta qarýyn, oq-dárilerin zańdy paıdalanýǵa alyp, keıin qaıta saqtaýǵa tapsyra alady.
«Qarýy barlarǵa úlken jaýapkershilik júktelgen. Ony saqtaýdyń da óz talaptary bar. Qarýdy tek seıfte jalǵyz ózin saqtaý qajet, al qala turǵyndary sondaı-aq dabyl ornatýy tıis. Polıtsııa qyzmetkerleri qarýdyń belgilengen erejelerge sáıkes saqtalýyna kóz jetkizý úshin qarý ıelerin turǵylyqty jerleri boıynsha tekserip turady. Qarýdyń ortalyqtandyrylǵan túrde saqtalýy ıelerin kóptegen keleńsiz jaıttardan saqtandyrady, qarýdyń urlanýyna, krımınaldyq ortaǵa túsýine jol bermeıdi», - deıdi SQO PD ákimshilik polıtsııa basqarmasynyń bastyǵy Serik Áljanov.
Jyl basynan oblys polıtseıleri qarý ıelerine qatysty 852 quqyq buzýshylyqty anyqtady, onyń 568-i qarýdy saqtaý erejelerin buzýmen baılanysty. Al azamattyq jáne qyzmettik qarý aınalymymen baılanysty máseleler boıynsha 8 (7152) 39-58-66 telefony arqyly keńes alýǵa bolady.
