Petropavlda qarttardy aldap aqshasyn alyp kelgen alaıaq áıel ustaldy
PETROPAVL. QazAqparat – Petropavlda medıtsınalyq maska kıgen áıel egde jastaǵylardyń úıine baryp, olardyń jıǵan-tergen aqshalaryn qoldy etip otyrǵan, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, sońǵy ýaqytta tártip saqshylaryna egde jastaǵy
qala turǵyndarynan alaıaqtyqqa qatysty aryzdar kóptep túse bastaǵan. Maska kıgen 43 jastaǵy áıel esik ashqan qarttarǵa ózin medıtsına qyzmetkeri retinde tanystyrǵan. Profılaktıkalyq tekseris júrgizip júrgenin aıtqan.
Áńgime barysynda jalǵan dáriger zeınetkerlerge senimdi túrde aqshanyń jaqynda ózgeretindigi týraly habarlaıdy. Qarttar úshin bul kútpegen jańalyq bolyp, áıelge barlyq jıǵan-tergenderin ustatatyn bolǵan. Alaıaq úı ıelerin vanna bólmesinde analızderin daıyndaýǵa kóndirip, ózi sol ýaqytta barlyq aqshany alyp, páterden taıyp turady.
Petropavl polıtseıleri ony osyndaı qylmys ústinde ustady. Alaıaq áıeldi kezekti qýlyǵyn iske asyryp, ańǵal eki zeınetkerdi aldap, mol somamen avtobýspen kele jatqanda qolǵa túsirdi.
Kúdikti áıel buǵan deıin Nur-Sultan qalasynda uqsas qylmystar jasaǵany úshin sotty bolǵan.
Petropavl qalalyq krımınaldyq polıtsııa bólimi bastyǵynyń orynbasary Erbolat Qaptaevtyń sózinshe, atalǵan fakti «Asa iri kólemde jasalǵan urlyq» baby boıynsha Sotqa deıingi tergep-tekserýdiń biryńǵaı tizilimine engizildi. Endi tártip saqshylaryna alaıaq áıelge egde jastaǵylardy kórsetkender, aýlalar men podezderge esh qıyndyqsyz kirýine kómekteskederdi anyqtaý qajet.
