Petropavlda qart júrgizýshi 83 jastaǵy áıeldi kólikpen qaǵyp ketti
PETROPAVL. QazAqparat – Petropavlda jeńil kólik júrgizýshisi joldy belgilenbegen jerden kesip ótpek bolǵan 83 jastaǵy áıeldi qaǵyp ketti. Zardap shegýshi aman, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, oqys oqıǵa 9 jeltoqsan kúni saǵat 14.45 shamasynda bolǵan. Astana-Chaıkovskıı kósheleriniń qıylysynda Audi 80 kóliginiń júrgizýshisi joldy belgilenbegen jerden kesip ótpek bolǵan 83 jastaǵy áıeldi qaǵyp ketti.
Zardap shegýshini jedel járdem qyzmeti oblys ortalyǵyndaǵy emdeý mekemelerdiń birine jetkizdi. Qazirgi ýaqytta zeınetker barlyq tıisti medıtsınalyq tekseristerden ótkizilip jatyr.
Jeńil kóliktiń rýlinde 71 jastaǵy er adam bolǵan. Medıtsınalyq kýálandyrý onyń spırttik ishimdik ishpegenin kórsetti.
Jol-kólik oqıǵasyna qatysty jınalǵan materıal ári qaraı protsessýaldyq sheshim qabyldanýy úshin Petropavl qalalyq polıtsııa basqarmasynyń ákimshilik polıtsııa bólimine joldandy.
Buǵan deıin Petropavldaǵy óndiristik kooperatıvtiń boksynda turǵan kóliktiń órtenip, bir adamnyń aýrýhanaǵa túskenin aıtqan edik. Órt saldarynan 62 jastaǵy er adam 1-2 dárejeli kúıik jaraqatyn aldy. Ol qazir 3-qalalyq aýrýhanada, jaq-bet hırýrgııasy bólimshesinde em alyp jatyr. Órt mashınanyń qozǵaltqyshynda shyqqan eken.
