Petropavlda Qarasaı men Aǵyntaı batyrlardyń eskertkishine gúl shoqtary qoıyldy
PETROPAVL. QazAqparat - Petropavlda erliktiń úlgisine aınalǵan qos batyr - Qarasaı men Aǵyntaı rýhtaryna taǵzym etilip, eskertkishterine gúl shoqtary qoıyldy, dep habarlaıdy QazAqparat tilshisi.
Qarasaı men Aǵyntaı - qazaqtyń qaharman batyrlary. XVII ǵasyrda Esim hannyń tusynda eldi jońǵarlardan qorǵaǵan. Qos batyr SQO-nyń Aıyrtaý aýdanyndaǵy Qulshynbaı tóbesinde jerlengen. 1999 jyly Petropavlda Qarasaı-Aǵyntaıǵa arnalyp eńseli eskertkish boı kóterdi. Erliktiń úlgisi, qazaq halqynyń maqtanyshyna aınalǵan batyrlar rýhyna bıyl da dástúr boıynsha Otan qorǵaýshylar kúni taǵzym etilip, qurmet kórsetildi.
Saltanatty sharaǵa UOS ardagerleri, tyl eńbekkerleri, áskerı qyzmetshiler, patrıottyq klýb músheleri, oqýshy-stýdentter, qala jurtshylyǵy qatysty.
«Bizdiń keleshegimiz - balalar qoldaryna tek qana oıynshyq myltyq ustaıtyn bolsyn! Qorǵanys myqty bolyp, eldi birliginen aıyrmasyn. Beıbit ómirde, osyndaı qoı ústine boztorǵaı jumyrtqalaǵan zamanda ómir súre bereıik», - deıdi SQO Qurmetti azamaty, tyl eńbekkeri Jaqsylyq Ysqaqov.
Petropavldaǵy Jastar saraıynda merekege oraı bir top áskerı qyzmetshiniń eńbegi elenip, marapatqa ıe boldy. Bes azamatqa SQO ákiminiń Qurmet gramotasy, 4-eýine Alǵys hat tabystaldy. Otan qorǵaýshylar kúnine arnalǵan saltanatty shara merekelik kontsertpen jalǵasyn tapty. Bul kúni sahnadan shyrqalǵan áskerı-patrıottyq ánder el qorǵany - er-azamattardyń qurmetine arnaldy.
