Petropavlda karantın talabyn saqtamaǵan 246 nysan anyqtaldy
PETROPAVL. QazAqparat – Petropavlda júrgizilgen reıdter barysynda 3 myńǵa jýyq nysan tekserildy. Sonyń 246 karantın talaptaryn buzý jaǵdaılary anyqtaldy, dep habarlaıdy QazAqparat tilshisi.
SQO taýarlar men kórsetiletin qyzmetterdiń sapasy men qaýipsizdigin baqylaý departamentiniń mamandary, tártip saqshylary halyq kóp júretin qalalyq saıabaqty, jazǵy dámhanalardy aralap, sanıtarlyq qaýipsizdik talaptarynyń oryndalýyn qadaǵalady.
Mamandardyń aıtýynsha, tótenshe jaǵdaı rejımi alynyp tastalǵannan keıin turǵyndar arqany keńge salyp, qaýipsizdik sharalaryna mán berýdi qoıǵan. Oblystyń bas sanıtarlyq dárigeriniń qaýlysy boıynsha, 1 maýsymnan bastap Petropavl qalalyq saıabaǵy esigin aıqara ashty. Alaıda qyzmetkerler kóńil kóterý ornynda sanıtarlyq talaptardy qatań saqtaýy tıis. ıAǵnı, mindetti túrde maska men rezeńke qolǵap kıip, átkenshekterdi ár 2-3 saǵat saıyn zararsyzdandyrýlary tıis. Kelýshilerdiń ara qashyqtyqty saqtaýyn da qadaǵalaýǵa mindetti. Bul talaptar halyq kóp shoǵyrlanǵan barlyq áleýmettik nysandarda saqtalýy tıis. Alaıda kóp jaǵdaıda osynyń bári oryndalmaıdy.
«Reıd barysynda anyqtaǵanymyz, kóptegen nysandarda sanıtaızerler bolmaıdy. Jalpy jıi kezdesetin olqylyqtar: satýshylardyń maskasyz jáne qolǵapsyz qyzmet kórsetýi jáne kelýshilerdiń de betperdesiz bolýy. Búgin biraz nysandarda boldyq, talapty buzǵandarǵa ákimshilik hattama toltyryldy. Sońǵy sheshimdi sot shyǵarady», - deıdi SQO taýarlar men kórsetiletin qyzmetterdiń sapasy men qaýipsizdigin baqylaý departamenti bóliminiń bas mamany Baqtııar Sadý.
Reıdti epıdemıolog mamandar men polıtseıler kún saıyn júrgizip keledi. Osy ýaqytqa deıin 2788 nysan tekserilip, karantın talabyn saqtamaýdyń 246 deregi anyqtaldy. Polıtseıler kásipkerlerge qatysty 28 ákimshilik materıal jınap, SQO taýarlar men kórsetiletin qyzmetterdiń sapasy men qaýipsizdigin baqylaý departamentine joldady. Qazir sottyń qaraýynda 13 materıal jatyr.
