Petropavlda qaraqshy zeınetkerdiń altyn alqasyn julyp áketpek boldy
PETROPAVL. QazAqparat – Petropavlda qaraqshy zeınetkerge shabýyl jasap, onyń altyn alqasyn julyp áketpek boldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, oqıǵa 3 maýsym kúni shamamen saǵat 14.00 bolǵan. Petropavldaǵy ortalyq kóshelerdiń birinde kele jatqan 65 jastaǵy qala turǵynyna bireý shabýyl jasap, onyń altyn alqasyn alyp ketpek bolǵan. Oǵan qylmystyq áreketin júzege asyrýǵa ótip bara jatqan adam kedergi bolypty.
Qala turǵyny birden «102» arnasyna habarlasty. Sol kúni jedel-izdestirý is-sharalarynyń nátıjesinde kúdikti ustaldy. Petropavldyń 36 jastaǵy turǵyny buryn múliktik qylmystar jasaǵany úshin sottalǵan eken. Adam tonaýǵa oqtalý faktisi Sotqa deıingi tergep-tekserýlerdiń biryńǵaı tizilimine engizildi. Kúdikti ýaqytsha ustaý ızolıatoryna qamaldy.
«Oblystyq polıtsııa basshylyǵy mundaı qylmystardyń ashylýyn erekshe baqylaýda ustaıdy. «Іzin sýytpaı» ashýda bólinisterdiń uıymdasqan jumysy ǵana emes, sonymen birge «102» arnasyna birden júginý de mańyzdy. Kúdiktini izdeýge patrýldi polıtseılerge baǵdar berilip, alynǵan sıpattama boıynsha uqsas kisilerdi beınebaqylaý operatorlary qadaǵalady. Jedel ýákilder múliktik qylmys jasaǵany úshin jaýapqa tartylǵan adamdar týraly málimetterdi tekserdi», - deıdi Soltústik Qazaqstan oblysy Polıtsııa departamenti bastyǵynyń orynbasary Rýslan Nazarov.
Jalpy jyl basynan SQO-da 33 tonaý tirkelip, onyń 30-y ashyldy.
