Petropavlda qar tazalamaǵan kásipker 50 myń teńge aıyppul tóleıdi
PETROPAVL. QazAqparat –Petropavlda tártip saqshylary 133 dúken men saýda oryndaryn aralap, ózine tıisti aýmaqty qardan tazartpaǵan 27 kásipkerge ákimshilik hattama toltyrdy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, qańtardyń alǵashqy kúnderi jergilikti polıtsııa qyzmeti basqarmasynyń mamandary oblys ortalyǵyndaǵy saýda oryndaryn aralady. Tártip saqshylary kásipkerlerge «SQO eldi mekender men qalalardyń aýmaqtaryn kórkeıtý erejelerin» eske saldy. Bul erejeni osydan úsh jyl buryn oblystyq máslıhat bekitken edi. Oǵan saı jeke jáne zańdy tulǵalar ózderine tıesili aýmaqty taza ustaýǵa mindetti. Buǵan deıingi eskertýge qulaq aspaǵan 27 kásipkerge QR Ákimshilik quqyq buzýshylyq týraly Kodeksiniń 505-baby boıynsha aıyppul salyndy.
Jańa jyldan bastap AEK mólsheri 2651 teńge bolǵandyqtan, aıyppul somasy da avtomatty túrde artty. Máselen Petropavldaǵy ortalyq kóshelerdiń birinde ornalasqan ǵımarat ıesi mańaıdaǵy qardy shyǵarmaǵany úshin endi 50 myń teńge aıyppul tóleıdi.
«Birneshe ret eskertip baryp qana aıyppul salamyz. Biz qoldanatyn negizgi shara – eskertý. Byltyr QR ÁQK 505-baby boıynsha 7699 adam ákimshilik jaýapkershilikke tartylsa, sonyń tek 206-syna ǵana aıyppul salyndy», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
Tártip saqshylary shyǵarylmaǵan qar turǵyndardyń erkin qozǵalýyna kedergi keltiretindigin, al kóktemde ol erip, yńǵaısyzdyq týdyratynyn eske salady.
Oblystyq jáne respýblıkalyq mańyzy bar joldardyń da ýaqytynda qardan tazalanbaýy – qaýipti. Tasjoldarda kezekshilik atqaratyn patrýldi polıtsııa batalonynyń qyzmetkerleri qar alǵan aýmaqtar men muz basqan jol ýchaskelerin baıqaǵan jaǵdaıda birden habarlaıdy. Bul aqparat tıisti mekemelerge berilip, joldarǵa arnaıy tehnıkalar shyǵarylady.
