Petropavlda qar kúreýge bıyl 14 kompanııa tartyldy
PETROPAVL. QazAqparat – Petropavlda qys túsken jarty aıdyń ishinde qala syrtyna 1700 tekshe metr qar shyǵaryldy, dep habarlaıdy QazAqparat tilshisi.
Bıyl Petropavl kóshelerin qardan tazartýǵa 14 mekeme jumyldyrylǵan. Olar 10 baǵyt boıynsha jumys istep jatyr. Kúndelikti atqarylatyn is-sharaǵa 65 tehnıka bólindi. Ázirge onyń teń jartysy ǵana tıisti jumystardy atqaryp jatyr.
Tehnıka oblys ortalyǵyn qardan arshýǵa saǵat 22.00-de shyǵyp, tańǵy saǵat 5.00-ge deıin jumys isteıdi. Al saǵat 5.00 men 7.00 aralyǵynda kóktaıǵaqqa qarsy is-sharalardy atqarady. Qysqy maýsymǵa 2500 tonna qum-tuz qospasy ázirlengen. Al aıaldamalar mańyna «ledorýb EKO» reagentteri sebilmek.
«Ázirge kóshelerdi qardan tazartýǵa belgili bir ýaqytta ǵana shyǵyp júrmiz. Biraq borandy kúnderi, qar kóp jaýǵan jaǵdaıda jumys kestemiz ózgerýi múmkin. Kúndiz shyǵarýǵa kezekshi tehnıka da ázirlep qoıdyq. Qala ákimdigimen tyǵyz qarym-qatynasta jumys isteımiz», - deıdi merdiger kompanııa basshysy Baǵlan Ysqaqov.
Jumysshylardyń aıtýynsha, saǵat 22.00-den keıin qala kóshelerinde qozǵalys saıabyrsıdy. Alaıda jol jıegine qaldyrylatyn kólikter olardyń jumysyna kedergi keltirýde.
«Oblys ortalyǵyn qardan tazartý, kóshelerge qum-tuz qospasyn sebý jumystary 25 qazannan bastaldy. 14 mekemege kósheler bólinip berildi. Olar osy aralyqta 1700 tekshe metr qar shyǵaryp úlgerdi. Qardyń kóshelerden shyǵarylýyn, jumystyń sapaly atqarylýyn baqylaýda ustaımyz», - deıdi Petropavl qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń baspasóz hatshysy Ásem Aıtýlova.
