Petropavlda qan tamyrǵa biregeı ota jasaldy
Máskeýlik maman soltústikqazaqstandyq kardıologtarǵa álemniń 10-nan astam klınıkasynda úshinshi jyl qoldanylyp kele jatqan ónimdi ımplanttaý tehnologııasyn kórsetti. Búgin az ınvazıvti ota oblystyń 4 turǵynyna jasalady. Solardyń biri - 68 jastaǵy áıel.
Operatsııa kezinde naýqas esin bilip jatady, jasalý ýaqyty kóp bolsa bir saǵat.
«Qazaqstanda alǵash ret dárilik jabyndysy bar koronarlyq ballon qoldanylyp jatyr. Bul jańa zamanaýı ónim, ınnovatsııalyq zertteme, júrektiń ıshemııalyq aýrýy bar syrqattarǵa qoldanylady.
Júrektiń ıshemııalyq aýrýy qaıdan paıda bolady ? Qan tamyrlardyń ishki qabatynda holesterınniń jınalyp qalýynan ol tarylady, biteledi. Mundaıda biz ádette stent qoıamyz. Biraq stentti ımplanttaǵannan keıin ol ýaqyt óte kele jaıylyp ósýi nemese tromb paıda bolýy múmkin. Bul naýqastyń ómir súrý sapasyn nasharlatady. Osyndaıda biz endi dárilik jabyndysy bar koronarlyq ballondy qoldana alamyz», - deıdi SQO kópbeıindi aýrýhana kardıologııalyq ortalyǵynyń rentgenendovaskýlıarlyq hırýrgııa jáne sáýlelik dıagnostıka bóliminiń meńgerýshisi Dmıtrıı Te.
Kardıologtyń aıtýynsha, koronarlyq stent qoıǵannan keıin naýqastardyń 10 paıyzynda restenoz, ıaǵnı qan tamyrdyń qaıta tarylýy nemese bitelýi baıqalady. Al dárilik jabyndysy bar koronarlyq ballondy engizýden keıin eshqandaı asqyný baıqalmaıdy. ıAǵnı syrqat qaıtadan ota stolyna jatpaıdy.
«Bul ballondarda stentterde bar kemshilikter joq. Jergilikti anestezııa arqyly qol býynyna kishkentaı ǵana tilik jasalady, ol jerge kateter qoıylyp, kúretamyr arqyly engiziledi. Ballondy ımplantatsııalaǵannan keıin bir mınýt ishinde dárilik zat zaqymdanǵan tamyrdyń ishki qabyrǵasyna ótedi. Bitelgen tamyr ashylyp, qan aǵyny qalpyna keledi. Al ballon qaıtyp alynady.
Bul tásil qazir búkil álemde qoldanylady. Tájirıbe kórsetkendeı, koronarlyq ballondy dıametri 2 mm kem qan tamyryna da qoıýǵa bolady, buryn tamyr tar bolǵandyqtan stent qoıýǵa kelmeıtin.
Taǵy bir aıta ketetin jaıt, eger buryn stent qoıǵannan keıin naýqas qandy suıyltatyn preparattardy bir jyl ishse, endi tek bir aı ǵana qabyldaýy kerek. Bul qan ketý qateri bar syrqattarda asqynýdy boldyrmaıdy», - deıdi Dmıtrıı Te.
Jalpy, oblystyq kardıologııalyq ortalyqta mamandar qazir jylyna 1200 stent qoıady. Endi onyń bir bóligin dárilik jabyndysy bar koronarlyq ballondy engizýmen almastyrylmaq. Ota MÁMS aıasynda tegin jasalady.
