Petropavlda Kamıl Safındi eske alýǵa arnalǵan bokstan respýblıkalyq týrnır bastaldy
PETROPAVL. QazAqparat – Petropavlda jastar arasynda bokstan halyqaralyq dárejedegi sport sheberi Kamıl Safındi eske alýǵa arnalǵan respýblıkalyq týrnır bastaldy, dep habarlaıdy QazAqparat tilshisi.
SQO Dene shynyqtyrý jáne sport basqarmasy baspasóz qyzmetiniń málimetinshe, K.Safın atyndaǵy respýblıkalyq týrnır bıyl altynshy jyl qatarynan uıymdastyryldy.
Oblystyq boks mektebiniń aldyna bir jyl buryn bokstan halyqaralyq dárejedegi sport sheberi Kamıl Safınge músin ornatyldy. Týrnırge arnaıy kelgen qonaqtar men sportshylar jarysty bastamas buryn osy eskertkishke gúl shoqtaryn qoıyp qurmet kórsetti.
Kamıl Safınniń ǵumyry qysqa boldy. Alaıda oǵan berilgen osy azǵantaı ýaqytta juldyzdaı jarqyraı bildi. KSRO-nyń halyqaralyq dárejedegi sport sheberi, 1978 jyly ótken Eýropa chempıonatynyń kúmis júldegeri, 1979 jylǵy álem Kýboginiń ıegeri, KSRO men AQSh arasynda ótken kezdesýlerdiń jeńimpazy, KSRO jáne KSRO halyqtary spartakıaasynyń chempıony, KSRO Kýbogynyń 4 dúrkin ıegeri. Sondaı-aq 1977 jyldan 1983 jylǵa deıin Keńester Odaǵy quramasynyń múshesi boldy.
Bul joly respýblıkalyq týrnırge qatysýǵa 80-nen astam sportshydan ótinish tústi. Nur-Sultan qalasynyń jáne SQO, Almaty, Aqmola, Batys Qazaqstan, Qaraǵandy, Qostanaı men Mańǵystaý oblystarynyń 16-17 jastaǵy bylǵary qolǵap sheberleri sharshy alańda kezdesedi.
Jarystyń birinshi kúni 52, 56, 60 jáne 69 keli salmaqty 17 jup qolǵap túıistirdi. Al fınaldyq kezdesýler 29 qarasha kúni ótedi.
