Petropavlda KamAZ kóligi turǵyn úıge soǵyldy

PETROPAVL. QazAqparat – Petropavldaǵy Potanın kóshesindegi jeke turǵyn úılerdiń birine júk kóligi soǵylyp, bir adam zardap shekti, dep habarlaıdy QazAqparat tilshisi.

Polıtsııa departamenti baspasóz qyzmetiniń málimetinshe, oqıǵa búgin keshki saǵat 20.00 shamasynda bolǵan. Oıqala yqsham aýdanynda KamAZ júk kóliginiń júrgizýshisi rólge ıe bola almaı qalyp, sham baǵanasy men eshkim turmaıtyn jeke turǵyn úıge soǵylǵan.

Polıtseılerdiń aıtýynsha, apattyń saldarynan ótip bara jatqan 1951 jylǵy jaıaý júrginshi dene jaraqatyn aldy. Ol birden qalalyq úshinshi aýrýhanaǵa jetkizildi. Al júk kóliginiń júrgizýshisi medıtsınalyq kýálendirýden ótýge jiberildi. Onyń nátıjesi boıynsha keıin shara qoldanylmaq.

Oblystyq densaýlyq saqtaý basqarmasy baspasóz qyzmetiniń málimetinshe, zardap shekken áıel úshinshi aýrýhananyń jaraqat bólimine jetkizildi. Aýyr jaraqaty joq, aıaǵyn ǵana aýyrtyp alǵandyqtan qyzy úıine alyp ketken.