Petropavlda qalalyq mádenıet úıiniń tóbesi opyrylyp tústi
Oqys oqıǵa keshe 24 aqpan kúni saǵat 20.10 mınýt ketkende bolǵan. Petropavldaǵy Sátpaev kóshesi, 37 meken-jaıynda ornalasqan qalalyq mádenıet úıiniń shatyry opyrylyp qulady.
SQO ákimdiginiń mádenıet, tilderdi damytý jáne muraǵat isi basqarmasynyń málimetinshe, ǵımarat eski, qurylymdardyń tozýy saldarynan tóbesi opyrylyp, kórermen zalynyń ústindegi shatyrdyń tirek arqalyqtary synǵan. Búlingen aýdan shamamen 500 m2 alyp jatyr. Zardap shekkender joq.
«2021 jylǵy maýsymda nysan shatyrynyń jaı-kúıin tehnıkalyq tekserý barysynda kontsert zalynyń ústindegi shatyrdyń apattyq jaǵdaıda turǵany týraly tehnıkalyq qorytyndy berildi. Tıisti saraptamadan ótkizilgennen keıin, shatyrdy kúrdeli jóndeýge byltyr 30 qarasha jobalyq-smetalyq qujattama ázirlendi. Qazirgi ýaqytta Petropavl qalasynyń ákimdigi, SQO ákimdiginiń mádenıet, tilderdi damytý jáne muraǵat isi basqarmasy máslıhattyń kezekti sessııasyna kúrdeli jóndeý júrgizý úshin qarajat bólý týraly ótinish berdi», - delingen basqarma taratqan habarlamada.
Petropavl qalalyq mádenıet úıinde 27 shyǵarmashylyq ujym - 548 adam eńbek etedi. Ótken jyldyń maýsym aıynan bastap osy ýaqytqa deıin shyǵarmashylyq ujymdar jalǵa beriletin ǵımarattarda jumys istep jatyr.
«Nysan ótken jyldyń qarasha aıynan beri apattyq jaǵdaıǵa baılanysty jabyq turǵan. Bul nysan kimniń balansynda tur, sol, ıaǵnı ákimdik jaýap beredi. Bul jerde zardap shekkender, qaza tapqandar bolmaǵandyqtan, bizdiń quziretimizge kirmeıdi», - deıdi SQO TJD mamandary.
Mádenıet úıi ǵımaraty 1930 jyldary salynǵan. Nysan 10 jyl buryn kúrdeli jóndeýden ótken. Endi kóne ǵımarat birtindep buzylyp jatyr. Byltyr qazan aıynyń sońynda nysannyń tóbesiniń bir bóligi qulaǵan edi.
