Petropavlda qala turǵyny polıtseılerden qashyp, qyzmettik avtokólikti soqty
Petropavl. QazAqparat - Petropavldyq polıtseıler bılik ókiline qatysty kúsh qoldaný faktisin tergeýde. Bul bıylǵy jyly tártip saqshylaryna baǵynbaýdyń osymen ekinshi oqıǵasy, dep habarlaıdy QazAqparat tilshisi.
SQO PD baspasóz qyzmetiniń habarlaýynsha, «Mersedes» avtomashınasy júrgizýshisiniń joldaǵy tártipsizdigi patrýldeý barysynda polıtseılerdiń nazaryn ózine aýdarǵan. Kólik júrgizýshisi toqtaý týraly bılik ókilderiniń zańdy talabyn elemeı, qashqan. Shamaly qýǵannan keıin quqyq buzýshy toqtatyldy, alaıda ol kólik salonynan shyǵýdan bas tartyp, aldynda turǵan polıtsııa qyzmetkeriniń avtomashınasyn soqty. Ony ustaý úshin tártip saqshylarynyń kúsh qoldanýlaryna týra keldi.
Petropavl kóshelerinde qaýipti jaǵdaı týdyrǵan 1978 jyly týǵan qala turǵyny eken. Buryn júrgizýshi kýáliginen aıyrylǵan. Polıtseılerden qashýyna jeńil dárejedegi alkogoldik masań kúıi de sebep bolýy múmkin. Oǵan qatysty jasaǵan buzýshylyqtary boıynsha ákimshilik hattama toltyryldy. Keıin Petropavl qalalyq PB 1-shi polıtsııa bóliminiń jedel-tergeý tobyna tapsyryldy.
«Atalǵan fakti QR Qylmystyq kodeksiniń «Bılik ókiline qatysty kúsh qoldaný» 380-baby boıynsha sotqa deıingi tergep-tekserýdiń biryńǵaı tizilimine engizildi», - dep habarlady Petropavl q. PB 1-shi PB bastyǵy polıtsııa polkovnıgi Balabek Jahın.
Bıylǵy jyly SQO-da Sotqa deıingi tergep-tekserýlerdiń biryńǵaı tizilimine polıtsııa qyzmetkerlerine baǵynbaýdyń osymen ekinshi faktisi engizilip otyr.
Aqerke Dáýrenbekqyzy
