Petropavlda qala turǵyndary 18 metrlik aqqala qalap jatyr
PETROPAVL. QazAqparat – Petropavl qalasynda uzyndyǵy 18 metr bolatyn alyp aqqala qalanyp jatyr. Osylaısha qala belsendileri halyqaralyq baıqaýǵa qatysyp, bas júlde — 100 myń rýbldi utyp almaqshy, dep habarlaıdy QazAqparat tilshisi.
Іs-sharany Petropavlda Experiment Show Youtube kanaly jáne onyń júrgizýshileriniń biri Artem Býhonın uıymdastyrǵan. Onyń aıtýynsha, reseılik Slivki show Youtube kanaly bıyl da TMD elderi arasynda erekshe aqqala qalaýdan dástúrli baıqaý ótkizip jatyr. Petropavldyqtar bas júldeni utyp alǵan jaǵdaıda qarajatty qaıyrymdylyqqa jumsamaqshy, ıaǵnı «Jaýapty júrek» qaıyrymdylyq qoryna aýdarady.
Іs-sharanyń ótetini týraly aldyn-ala áleýmettik jelilerde jarııalandy. Aqqala qalanatyn oryn daýys berý arqyly tańdalynyp, Petropavldaǵy Pestroe kóliniń mańy belgilendi. Baıqaýǵa qatysýshylar 18 metrlik aqqala qalaý úshin aǵashtan úsh sheńber ornatyp, endi ishin qarǵa toltyrmaqshy.
«18 metr dep tańdaýymyzdyń basty sebebi – ótken jylǵy rekordty jańartý. Byltyr mega aqqala 15 metrlik boldy. Aqqalany bıiginen emes, jatqyzyp qalaımyz. Jumysy kóp. Ókinishke qaraı demalys kúnderi kómekke halyq az jınaldy. Biraq bizdiń aqpan aıyna deıin ýaqytymyz bar. Daıyn aqqalany keıin sýretshi boıap, ásemdeıdi», - deıdi Artem Býhonın.
Baıqaýdyń talaptary boıynsha, aqqalanyń erekshe bolýy mańyzdy. Sondaı-aq tehnıkasyz tek qolmen jasalýy kerek.
«Bıyl ótken jyldyń jeńimpazdary reseıge qaraǵanda bizde qar kóp. Sol sebepti múmkindigimiz joǵary. Qala turǵyndary da belsendilik tanytyp, óz úlesterin qosady dep senemin. Tabıǵat aıasynda qar kúregen eń aldymen densaýlyqqa paıdaly, ári jeńip jatsaq qalamyzdyń atyn shyǵaryp, oń ımıdj qalyptastyramyz. Qorǵa da aqsha aýdaryp, muqtaj jandarǵa kómektesemiz», - deıdi uıymdastyrýshylardyń biri Artem Býhonın.
