Petropavlda qala týraly mobıldik qosymsha iske qosylady
Jobalardy iske asyrý úshin tsıfrlandyrý keńsesi quryldy. Engizilip otyrǵan ónimderdiń tıimdiligin kórý úshin turǵyndar men jańalyqtardy óz jumysynda paıdalanatyn qyzmetkerler tsıfrlyq saýattylyqqa úıretilýde.
«Aımaqta ІT salasyn damytý, tabysty ІT jobalardy iske asyrýda tájirıbelik kómek kórsetý úshin S.Muqanov atyndaǵy ǵylymı kitaphanada Startap-ortalyq ashyldy. Jańadan bastap júrgen startaperlerge ІT salasynda, marketıng jáne ınvestıtsııalaýda joǵary quzyreti bar jergilikti kompanııanyń qyzmetkerleri keńes beredi. Ortalyqta barlyq qajetti joǵary tehnologııalyq zamanaýı jabdyqtar bar», - dep baıandady Soltústik Qazaqstan oblysy ákiminiń orynbasary Madııar Qojahmet.
Qazirgi kezde qalada Smart Petropavlovsk atty mobıldik qosymsha ázirlený ústinde. Onda aımaq týraly barlyq qajetti aqparat pen paıdaly servısterdi tabýǵa bolady. M.Qojahmettiń aıtýynsha, qosymshanyń negizgi mindeti - qala turǵyndary men qonaqtary úshin qoljetimdilik pen aqparat sapasynyń deńgeıin arttyrý.
«Bilimdi» tehnologııalar Petropavldyń bilim mekemelerine de engizilýde. «Smart-balabaqsha» júıesi «Altyn besik» balabaqshasynda bar, jyl sońyna deıin taǵy 4 balabaqshada iske qosady. S.Shaımerdenov atyndaǵy qalalyq klassıkalyq gımnazııada «Smart-mektep» jobasy iske qosyldy.
Ótken jyldan bastap qalalyq ákimdikte «Ashyq ákimdik» jobasy jumys isteı bastaǵan. Bir jylǵa jýyq ýaqytta ákimdik bólimderine 30 myńnan astam adam júgindi. Memlekettik qyzmet túrlerin alý úshin kúnine orta eseppen alǵanda 180-200 adam kelip turady.
«Jobanyń basty basymdyqtary - memqyzmetterdi kórsetý kezinde sybaılas jemqorlyq qaýpin tómendetý, elektrondyq kezektiń yńǵaıly júıesi, qyzmet alýshylar úshin qolaıly jaǵdaı qurý», - dep atap ótti M.Qojahmet.