Petropavlda qala syrtynda órtengen qamysty sóndirýge 70-ten astam maman jumyldyryldy
PETROPAVL. QazAqparat – Petropavldaǵy Sennaıa baza aýmaǵynda órt shyǵyp, daýyldyń saldarynan ony úsh saǵattan keıin ǵana tolyq sóndirý múmkin boldy, dep habarlaıdy QazAqparat tilshisi.
Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, saǵat 19.03 mınýtte Petropavldyń shetkeri aýdandarynyń biri – Sennaıa baza aýmaǵynda qamystyń janyp jatqandyǵy jóninde habarlama túsedi. Oqıǵa ornyna jetken órt sóndirýshilerdiń alǵashqy toby jaqyn mańdaǵy turǵyn úılerge jáne ónerkásip nysandaryna qaýip tóngenin kóredi. Birden joǵary órt qaýpi deńgeıi jarııalanyp, jergilikti atqarýshy organdar eskertildi.
«Qatty jelde, ári qarańǵyda batpaqty jerde jalynmen kúresý ońaı bolǵan joq. Tótenshe jaǵdaı ornyn polıtsııa qyzmetkerleri qorshady. Órtpen kúreske 10 tehnıka men jeke quramnan 61 adam jáne «Órt sóndirýshi» AQ fılıalynan 1 tehnıka men 3 adam jáne jergilikti atqarýshy organdardan 5 tehnıka men 9 adam jumyldyryldy.
Órt shamamen 10 ga aýmaqty sharpydy. Órt tolyǵymen saǵat 22.19 mınýtta sóndirildi. Mamandardyń aıtýynsha, qaza tapqandar men zardap shekkender joq.
