Petropavlda iz-túzsiz joǵalǵan 15 jastaǵy bala aman-esen tabyldy
PETROPAVL. QazAqparat – Petropavlda áleýmettik jeli arqyly izdeý jarııalanǵan 15 jasar jasóspirim polıtseılerdiń kómegimen aman-esen tabyldy, dep habarlaıdy QazAqparat tilshisi.
Petropavlda áleýmettik jelidegi jergilikti pablıkterde 2006 jyly týǵan jasóspirimniń joǵalǵandyǵy týraly jazba tarady.
«Jasóspirim Shýhov kóshesinde turady, alaıda búgin túnde Muqanov kóshesi, 54 mekenjaıynda ornalasqan «Donernaıa» mekemesinen jumystan shyǵyp, belgisiz jaqqa ketken. Bala baılanysqa shyqpaıdy, uzaq ýaqyttan beri habar joq», - delingen jazbada.
Polıtseıler izdeý jarııalanǵan balany aman-esen tapty.
Soltústik Qazaqstan oblysy polıtsııa departamenti baspasóz qyzmetiniń málimetinshe, tamyzdyń 9-y saǵat 07.11-de polıtsııaǵa 15 jasar er balanyń túnde joǵalǵany týraly habarlama tústi. Ógeı ákesiniń sharýasyna kómekteskenen keıin joǵalyp ketken. Otbasynyń astanadan Petropavlǵa kóship kelgenine eki aptadaı bolypty.
Jasóspirimdi izdeýge ıývenaldyq polıtsııa bóliminiń jeke quramy túgel, krımınaldyq polıtsııanyń jedel ýákilderi, volonterler jumyldyryldy.
Tanymal qalalyq pablıkterdiń ákimgerleri de izdeýge óz erikterimen qosyldy, olar Instagram jáne VKontakte lentalarynda fotobaǵdarlar jarııalady.
Nátıjesinde, búgin saǵat 15.30-da balany krımınaldyq polıtsııa bóliminiń qyzmetkerleri jáne aǵa jedel ýákilder aman-esen tapty. Bala joǵalǵan jerge jaqyn mańdaǵy kópqabatty úılerdiń biriniń podezinde bolǵan. Barlyq mán-jaıdy anyqtaý jáne profılaktıkalyq áńgime júrgizý úshin jasóspirim zańdy ókilderimen birge ıývenaldyq polıtsııa bólimshesine jetkizildi.
SQO-da jyl basynan polıtseıler iz-túzsiz joǵalǵan 70 jasóspirimdi izdep tapty.
